Greek Reader — Thucydides, Histories (4.86.1

4.86.1 αὐτός τε οὐκ ἐπὶ κακῷ , ἐπ’ ἐλευθερώσει δὲ τῶν Ἑλλήνων παρελήλυθα , ὅρκοις τε Λακεδαιμονίων καταλαβὼν τὰ τέλη τοῖς μεγίστοις ἦ μὴν οὓς ἂν ἔγωγε προσαγάγωμαι ξυμμάχους ἔσεσθαι αὐτονόμους , καὶ ἅμα οὐχ ἵνα ξυμμάχους ὑμᾶς ἔχωμεν ἢ βίᾳ ἢ ἀπάτῃ προσλαβόντες , ἀλλὰ τοὐναντίον ὑμῖν δεδουλωμένοις ὑπὸ Ἀθηναίων ξυμμαχήσοντες .

4.86.2 οὔκουν ἀξιῶ οὔτ’ αὐτὸς ὑποπτεύεσθαι , πίστεις γε διδοὺς τὰς μεγίστας , οὐδὲ τιμωρὸς ἀδύνατος νομισθῆναι , προσχωρεῖν τε ὑμᾶς θαρσήσαντας .

4.86.3 καὶ εἴ τις ἰδίᾳ τινὰ δεδιὼς ἄρα , μὴ ἐγώ τισι προσθῶ τὴν πόλιν , ἀπρόθυμός ἐστι , πάντων μάλιστα πιστευσάτω .

4.86.4 οὐ γὰρ ξυστασιάσων ἥκω , οὐδὲ ἂν σαφῆ τὴν ἐλευθερίαν νομίζω ἐπιφέρειν , εἰ τὸ πάτριον παρεὶς τὸ πλέον τοῖς ὀλίγοις ἢ τὸ ἔλασσον τοῖς πᾶσι δουλώσαιμι .

4.86.5 χαλεπωτέρα γὰρ ἂν τῆς ἀλλοφύλου ἀρχῆς εἴη , καὶ ἡμῖν τοῖς Λακεδαιμονίοις οὐκ ἂν ἀντὶ πόνων χάρις καθίσταιτο , ἀντὶ δὲ τιμῆς καὶ δόξης αἰτία μᾶλλον · οἷς τε τοὺς Ἀθηναίους ἐγκλήμασι καταπολεμοῦμεν , αὐτοὶ ἂν φαινοίμεθα ἐχθίονα ἢ ὁ μὴ ὑποδείξας ἀρετὴν κατακτώμενοι .

4.86.6 ἀπάτῃ γὰρ εὐπρεπεῖ αἴσχιον τοῖς γε ἐν ἀξιώματι πλεονεκτῆσαι ἢ βίᾳ ἐμφανεῖ · τὸ μὲν γὰρ ἰσχύος δικαιώσει , ἣν ἡ τύχη ἔδωκεν , ἐπέρχεται , τὸ δὲ γνώμης ἀδίκου ἐπιβουλῇ .

4.87.1 οὕτω πολλὴν περιωπὴν τῶν ἡμῖν ἐς τὰ μέγιστα διαφόρων ποιούμεθα , καὶ οὐκ ἂν μείζω πρὸς τοῖς ὅρκοις βεβαίωσιν λάβοιτε ἢ οἷς τὰ ἔργα ἐκ τῶν λόγων ἀναθρούμενα δόκησιν ἀναγκαίαν παρέχεται ὡς καὶ ξυμφέρει ὁμοίως ὡς εἶπον .

Morphology & Lexicon ( hover to peek ✧ click to lock )

Morphology & Lexicon
( hover to peek ✧ click to lock )