24.154 ἵκοντο προτὶ ἄστυ περικλυτόν , ἦ τοι Ὀδυσσεὺς
24.155 ὕστερος , αὐτὰρ Τηλέμαχος πρόσθʹ ἡγεμόνευε .
24.156 τὸν δὲ συβώτης ἦγε κακὰ χροῒ εἵματʹ ἔχοντα ,
24.157 πτωχῷ λευγαλέῳ ἐναλίγκιον ἠδὲ γέροντι
24.158 σκηπτόμενον · τὰ δὲ λυγρὰ περὶ χροῒ εἵματα ἕστο ·
24.159 οὐδέ τις ἡμείων δύνατο γνῶναι τὸν ἐόντα
24.160 ἐξαπίνης προφανέντʹ , οὐδʹ οἳ προγενέστεροι ἦσαν ,
24.161 ἀλλʹ ἔπεσίν τε κακοῖσιν ἐνίσσομεν ἠδὲ βολῇσιν .
24.162 αὐτὰρ ὁ τῆος ἐτόλμα ἐνὶ μεγάροισιν ἑοῖσι
24.163 βαλλόμενος καὶ ἐνισσόμενος τετληότι θυμῷ ·
24.164 ἀλλʹ ὅτε δή μιν ἔγειρε Διὸς νοός αἰγιόχοιο ,
24.165 σὺν μὲν Τηλεμάχῳ περικαλλέα τεύχεʹ ἀείρας
24.166 ἐς θάλαμον κατέθηκε καὶ ἐκλήϊσεν ὀχῆας ,
24.167 αὐτὰρ ὁ ἣν ἄλοχον πολυκερδείῃσιν ἄνωγε
24.168 τόξον μνηστήρεσσι θέμεν πολιόν τε σίδηρον ,
24.169 ἡμῖν αἰνομόροισιν ἀέθλια καὶ φόνου ἀρχήν .
24.170 οὐδέ τις ἡμείων δύνατο κρατεροῖο βιοῖο
24.171 νευρὴν ἐντανύσαι , πολλὸν δʹ ἐπιδευέες ἦμεν .
24.172 ἀλλʹ ὅτε χεῖρας ἵκανεν Ὀδυσσῆος μέγα τόξον ,
24.173 ἔνθʹ ἡμεῖς μὲν πάντες ὁμοκλέομεν ἐπέεσσι
24.174 τόξον μὴ δόμεναι , μηδʹ εἰ μάλα πολλʹ ἀγορεύοι ·
24.175 Τηλέμαχος δέ μιν οἶος ἐποτρύνων ἐκέλευσεν .
24.176 αὐτὰρ ὁ δέξατο χειρὶ πολύτλας δῖος Ὀδυσσεύς ,
24.177 ῥηϊδίως δʹ ἐτάνυσσε βιόν , διὰ δʹ ἧκε σιδήρου ,
24.178 στῆ δʹ ἄρʹ ἐπʹ οὐδὸν ἰών , ταχέας δʹ ἐκχεύατʹ ὀϊστοὺς
24.179 δεινὸν παπταίνων , βάλε δʹ Ἀντίνοον βασιλῆα .
24.180 αὐτὰρ ἔπειτʹ ἄλλοις ἐφίει βέλεα στονόεντα ,
24.181 ἄντα τιτυσκόμενος · τοὶ δʹ ἀγχιστῖνοι ἔπιπτον .
24.182 γνωτὸν δʹ ἦν ὅ ῥά τίς σφι θεῶν ἐπιτάρροθος ἦεν ·
24.183 αὐτίκα γὰρ κατὰ δώματʹ ἐπισπόμενοι μένεϊ σφῷ
24.184 κτεῖνον ἐπιστροφάδην , τῶν δὲ στόνος ὤρνυτʹ ἀεικὴς
24.185 κράτων τυπτομένων , δάπεδον δʹ ἅπαν αἵματι θῦεν .