24.124 ἡμετέρου θανάτοιο κακὸν τέλος , οἷον ἐτύχθη .
24.125 μνώμεθʹ Ὀδυσσῆος δὴν οἰχομένοιο δάμαρτα ·
24.126 ἡ δʹ οὔτʹ ἠρνεῖτο στυγερὸν γάμον οὔτʹ ἐτελεύτα ,
24.127 ἡμῖν φραζομένη θάνατον καὶ κῆρα μέλαιναν ,
24.128 ἀλλὰ δόλον τόνδʹ ἄλλον ἐνὶ φρεσὶ μερμήριξε ·
24.129 στησαμένη μέγαν ἱστὸν ἐνὶ μεγάροισιν ὕφαινε ,
24.130 λεπτὸν καὶ περίμετρον · ἄφαρ δʹ ἡμῖν μετέειπε ·
24.131 κοῦροι ἐμοὶ μνηστῆρες , ἐπεὶ θάνε δῖος Ὀδυσσεύς ,
24.132 μίμνετʹ ἐπειγόμενοι τὸν ἐμὸν γάμον , εἰς ὅ κε φᾶρος
24.133 ἐκτελέσω , μή μοι μεταμώνια νήματʹ ὄληται ,
24.134 Λαέρτῃ ἥρωϊ ταφήϊον , εἰς ὅτε κέν μιν
24.135 μοῖρʹ ὀλοὴ καθέλῃσι τανηλεγέος θανάτοιο ,
24.136 μή τίς μοι κατὰ δῆμον Ἀχαιϊάδων νεμεσήσῃ ,
24.137 αἴ κεν ἄτερ σπείρου κεῖται πολλὰ κτεατίσσας .
24.138 ὣς ἔφαθʹ , ἡμῖν δʹ αὖτʹ ἐπεπείθετο θυμὸς ἀγήνωρ .
24.139 ἔνθα καὶ ἠματίη μὲν ὑφαίνεσκεν μέγαν ἱστόν ,
24.140 νύκτας δʹ ἀλλύεσκεν , ἐπεὶ δαΐδας παραθεῖτο .
24.141 ὣς τρίετες μὲν ἔληθε δόλῳ καὶ ἔπειθεν Ἀχαιούς ·
24.142 ἀλλʹ ὅτε τέτρατον ἦλθεν ἔτος καὶ ἐπήλυθον ὧραι ,
24.143 μηνῶν φθινόντων , περὶ δʹ ἤματα πόλλʹ ἐτελέσθη ,
24.144 καὶ τότε δή τις ἔειπε γυναικῶν , ἣ σάφα ᾔδη ,
24.145 καὶ τήν γʹ ἀλλύουσαν ἐφεύρομεν ἀγλαὸν ἱστόν .
24.146 ὣς τὸ μὲν ἐξετέλεσσε καὶ οὐκ ἐθέλουσʹ , ὑπʹ ἀνάγκης .
24.147 εὖθʹ ἡ φᾶρος ἔδειξεν , ὑφήνασα μέγαν ἱστόν ,
24.148 πλύνασʹ , ἠελίῳ ἐναλίγκιον ἠὲ σελήνῃ ,
24.149 καὶ τότε δή ῥʹ Ὀδυσῆα κακός ποθεν ἤγαγε δαίμων
24.150 ἀγροῦ ἐπʹ ἐσχατιήν , ὅθι δώματα ναῖε συβώτης .
24.151 ἔνθʹ ἦλθεν φίλος υἱὸς Ὀδυσσῆος θείοιο ,
24.152 ἐκ Πύλου ἠμαθόεντος ἰὼν σὺν νηῒ μελαίνῃ ·
24.153 τὼ δὲ μνηστῆρσιν θάνατον κακὸν ἀρτύναντε