22.231 πῶς δὴ νῦν , ὅτε σόν τε δόμον καὶ κτήμαθʹ ἱκάνεις ,
22.232 ἄντα μνηστήρων ὀλοφύρεαι ἄλκιμος εἶναι ;
22.233 ἀλλʹ ἄγε δεῦρο , πέπον , παρʹ ἔμʹ ἵστασο καὶ ἴδε ἔργον ,
22.234 ὄφρʹ εἰδῇς οἷός τοι ἐν ἀνδράσι δυσμενέεσσιν
22.235 Μέντωρ Ἀλκιμίδης εὐεργεσίας ἀποτίνειν .
22.236 ἦ ῥα , καὶ οὔ πω πάγχυ δίδου ἑτεραλκέα νίκην ,
22.237 ἀλλʹ ἔτʹ ἄρα σθένεός τε καὶ ἀλκῆς πειρήτιζεν
22.238 ἠμὲν Ὀδυσσῆος ἠδʹ υἱοῦ κυδαλίμοιο .
22.239 αὐτὴ δʹ αἰθαλόεντος ἀνὰ μεγάροιο μέλαθρον
22.240 ἕζετʹ ἀναΐξασα , χελιδόνι εἰκέλη ἄντην .
22.241 μνηστῆρας δʹ ὤτρυνε Δαμαστορίδης Ἀγέλαος ,
22.242 Εὐρύνομός τε καὶ Ἀμφιμέδων Δημοπτόλεμός τε ,
22.243 Πείσανδρός τε Πολυκτορίδης Πόλυβός τε δαΐφρων ·
22.244 οἱ γὰρ μνηστήρων ἀρετῇ ἔσαν ἔξοχʹ ἄριστοι ,
22.245 ὅσσοι ἔτʹ ἔζωον περί τε ψυχέων ἐμάχοντο ·
22.246 τοὺς δʹ ἤδη ἐδάμασσε βιὸς καὶ ταρφέες ἰοί .
22.247 τοῖς δʹ Ἀγέλεως μετέειπεν , ἔπος πάντεσσι πιφαύσκων ·
22.248 ὦ φίλοι , ἤδη σχήσει ἀνὴρ ὅδε χεῖρας ἀάπτους ·
22.249 καὶ δή οἱ Μέντωρ μὲν ἔβη κενὰ εὔγματα εἰπών ,
22.250 οἱ δʹ οἶοι λείπονται ἐπὶ πρώτῃσι θύρῃσι .
22.251 τῷ νῦν μὴ ἅμα πάντες ἐφίετε δούρατα μακρά ,
22.252 ἀλλʹ ἄγεθʹ οἱ ἓξ πρῶτον ἀκοντίσατʹ , αἴ κέ ποθι Ζεὺς
22.253 δώῃ Ὀδυσσῆα βλῆσθαι καὶ κῦδος ἀρέσθαι .
22.254 τῶν δʹ ἄλλων οὐ κῆδος , ἐπὴν οὗτός γε πέσῃσιν .
22.255 ὣς ἔφαθʹ , οἱ δʹ ἄρα πάντες ἀκόντισαν ὡς ἐκέλευεν ,
22.256 ἱέμενοι · τὰ δὲ πάντα ἐτώσια θῆκεν Ἀθήνη ,
22.257 τῶν ἄλλος μὲν σταθμὸν ἐϋσταθέος μεγάροιο
22.258 βεβλήκει , ἄλλος δὲ θύρην πυκινῶς ἀραρυῖαν ·
22.259 ἄλλου δʹ ἐν τοίχῳ μελίη πέσε χαλκοβάρεια .
22.260 αὐτὰρ ἐπεὶ δὴ δούρατʹ ἀλεύαντο μνηστήρων ,