22.86 καὶ δέπας ἀμφικύπελλον · ὁ δὲ χθόνα τύπτε μετώπῳ
22.87 θυμῷ ἀνιάζων , ποσὶ δὲ θρόνον ἀμφοτέροισι
22.88 λακτίζων ἐτίνασσε · κατʹ ὀφθαλμῶν δʹ ἔχυτʹ ἀχλύς .
22.89 Ἀμφίνομος δʹ Ὀδυσῆος ἐείσατο κυδαλίμοιο
22.90 ἀντίος ἀΐξας , εἴρυτο δὲ φάσγανον ὀξύ ,
22.91 εἴ πώς οἱ εἴξειε θυράων . ἀλλʹ ἄρα μιν φθῆ
22.92 Τηλέμαχος κατόπισθε βαλὼν χαλκήρεϊ δουρὶ
22.93 ὤμων μεσσηγύς , διὰ δὲ στήθεσφιν ἔλασσεν ·
22.94 δούπησεν δὲ πεσών , χθόνα δʹ ἤλασε παντὶ μετώπῳ .
22.95 Τηλέμαχος δʹ ἀπόρουσε , λιπὼν δολιχόσκιον ἔγχος
22.96 αὐτοῦ ἐν Ἀμφινόμῳ · περὶ γὰρ δίε μή τις Ἀχαιῶν
22.97 ἔγχος ἀνελκόμενον δολιχόσκιον ἢ ἐλάσειε
22.98 φασγάνῳ ἀΐξας ἠὲ προπρηνέα τύψας .
22.99 βῆ δὲ θέειν , μάλα δʹ ὦκα φίλον πατέρʹ εἰσαφίκανεν ,
22.100 ἀγχοῦ δʹ ἱστάμενος ἔπεα πτερόεντα προσηύδα ·
22.101 ὦ πάτερ , ἤδη τοι σάκος οἴσω καὶ δύο δοῦρε
22.102 καὶ κυνέην πάγχαλκον , ἐπὶ κροτάφοις ἀραρυῖαν
22.103 αὐτός τʹ ἀμφιβαλεῦμαι ἰών , δώσω δὲ συβώτῃ
22.104 καὶ τῷ βουκόλῳ ἄλλα · τετευχῆσθαι γὰρ ἄμεινον .
22.105 τὸν δʹ ἀπαμειβόμενος προσέφη πολύμητις Ὀδυσσεύς ·
22.106 οἶσε θέων , ἧός μοι ἀμύνεσθαι πάρʹ ὀϊστοί ,
22.107 μή μʹ ἀποκινήσωσι θυράων μοῦνον ἐόντα .
22.108 ὣς φάτο , Τηλέμαχος δὲ φίλῳ ἐπεπείθετο πατρί ,
22.109 βῆ δʹ ἴμεναι θάλαμόνδʹ , ὅθι οἱ κλυτὰ τεύχεα κεῖτο .
22.110 ἔνθεν τέσσαρα μὲν σάκεʹ ἔξελε , δούρατα δʹ ὀκτὼ
22.111 καὶ πίσυρας κυνέας χαλκήρεας ἱπποδασείας ·
22.112 βῆ δὲ φέρων , μάλα δʹ ὦκα φίλον πατέρʹ εἰσαφίκανεν ,
22.113 αὐτὸς δὲ πρώτιστα περὶ χροῒ δύσετο χαλκόν ·
22.114 ὣς δʹ αὔτως τὼ δμῶε δυέσθην τεύχεα καλά ,
22.115 ἔσταν δʹ ἀμφʹ Ὀδυσῆα δαΐφρονα ποικιλομήτην .