22.58 χαλκόν τε χρυσόν τʹ ἀποδώσομεν , εἰς ὅ κε σὸν κῆρ
22.59 ἰανθῇ · πρὶν δʹ οὔ τι νεμεσσητὸν κεχολῶσθαι .
22.60 τὸν δʹ ἄρʹ ὑπόδρα ἰδὼν προσέφη πολύμητις Ὀδυσσεύς ·
22.61 Εὐρύμαχʹ , οὐδʹ εἴ μοι πατρώϊα πάντʹ ἀποδοῖτε ,
22.62 ὅσσα τε νῦν ὔμμʹ ἐστὶ καὶ εἴ ποθεν ἄλλʹ ἐπιθεῖτε ,
22.63 οὐδέ κεν ὣς ἔτι χεῖρας ἐμὰς λήξαιμι φόνοιο
22.64 πρὶν πᾶσαν μνηστῆρας ὑπερβασίην ἀποτῖσαι .
22.65 νῦν ὑμῖν παράκειται ἐναντίον ἠὲ μάχεσθαι
22.66 ἢ φεύγειν , ὅς κεν θάνατον καὶ κῆρας ἀλύξῃ ·
22.67 ἀλλά τινʹ οὐ φεύξεσθαι ὀΐομαι αἰπὺν ὄλεθρον .
22.68 ὣς φάτο , τῶν δʹ αὐτοῦ λύτο γούνατα καὶ φίλον ἦτορ .
22.69 τοῖσιν δʹ Εὐρύμαχος προσεφώνεε δεύτερον αὖτις ·
22.70 ὦ φίλοι , οὐ γὰρ σχήσει ἀνὴρ ὅδε χεῖρας ἀάπτους ,
22.71 ἀλλʹ ἐπεὶ ἔλλαβε τόξον ἐΰξοον ἠδὲ φαρέτρην ,
22.72 οὐδοῦ ἄπο ξεστοῦ τοξάσσεται , εἰς ὅ κε πάντας
22.73 ἄμμε κατακτείνῃ · ἀλλὰ μνησώμεθα χάρμης .
22.74 φάσγανά τε σπάσσασθε καὶ ἀντίσχεσθε τραπέζας
22.75 ἰῶν ὠκυμόρων · ἐπὶ δʹ αὐτῷ πάντες ἔχωμεν
22.76 ἀθρόοι , εἴ κέ μιν οὐδοῦ ἀπώσομεν ἠδὲ θυράων ,
22.77 ἔλθωμεν δʹ ἀνὰ ἄστυ , βοὴ δʹ ὤκιστα γένοιτο ·
22.78 τῷ κε τάχʹ οὗτος ἀνὴρ νῦν ὕστατα τοξάσσαιτο .
22.79 ὣς ἄρα φωνήσας εἰρύσσατο φάσγανον ὀξὺ
22.80 χάλκεον , ἀμφοτέρωθεν ἀκαχμένον , ἆλτο δʹ ἐπʹ αὐτῷ
22.81 σμερδαλέα ἰάχων · ὁ δʹ ἁμαρτῆ δῖος Ὀδυσσεὺς
22.82 ἰὸν ἀποπροίει , βάλε δὲ στῆθος παρὰ μαζόν ,
22.83 ἐν δέ οἱ ἥπατι πῆξε θοὸν βέλος · ἐκ δʹ ἄρα χειρὸς
22.84 φάσγανον ἧκε χαμᾶζε , περιρρηδὴς δὲ τραπέζῃ
22.85 κάππεσεν ἰδνωθείς , ἀπὸ δʹ εἴδατα χεῦεν ἔραζε