22.116 αὐτὰρ ὅ γʹ , ὄφρα μὲν αὐτῷ ἀμύνεσθαι ἔσαν ἰοί .
22.117 τόφρα μνηστήρων ἕνα γʹ αἰεὶ ᾧ ἐνὶ οἴκῳ
22.118 βάλλε τιτυσκόμενος · τοὶ δʹ ἀγχιστῖνοι ἔπιπτον .
22.119 αὐτὰρ ἐπεὶ λίπον ἰοὶ ὀϊστεύοντα ἄνακτα ,
22.120 τόξον μὲν πρὸς σταθμὸν ἐϋσταθέος μεγάροιο
22.121 ἔκλινʹ ἑστάμεναι , πρὸς ἐνώπια παμφανόωντα ,
22.122 αὐτὸς δʹ ἀμφʹ ὤμοισι σάκος θέτο τετραθέλυμνον ,
22.123 κρατὶ δʹ ἐπʹ ἰφθίμῳ κυνέην εὔτυκτον ἔθηκεν ,
22.124 ἵππουριν , δεινὸν δὲ λόφος καθύπερθεν ἔνευεν ·
22.125 εἵλετο δʹ ἄλκιμα δοῦρε δύω κεκορυθμένα χαλκῷ .
22.126 ὀρσοθύρη δέ τις ἔσκεν ἐϋδμήτῳ ἐνὶ τοίχῳ ,
22.127 ἀκρότατον δὲ παρʹ οὐδὸν ἐϋσταθέος μεγάροιο
22.128 ἦν ὁδὸς ἐς λαύρην , σανίδες δʹ ἔχον εὖ ἀραρυῖαι .
22.129 τὴν δʹ Ὀδυσεὺς φράζεσθαι ἀνώγει δῖον ὑφορβὸν
22.130 ἑσταότʹ ἄγχʹ αὐτῆς · μία δʹ οἴη γίγνετʹ ἐφορμή .
22.131 τοῖς δʹ Ἀγέλεως μετέειπεν , ἔπος πάντεσσι πιφαύσκων ·
22.132 ὦ φίλοι , οὐκ ἂν δή τις ἀνʹ ὀρσοθύρην ἀναβαίη
22.133 καὶ εἴποι λαοῖσι , βοὴ δʹ ὤκιστα γένοιτο ;
22.134 τῷ κε τάχʹ οὗτος ἀνὴρ νῦν ὕστατα τοξάσσαιτο .
22.135 τὸν δʹ αὖτε προσέειπε Μελάνθιος , αἰπόλος αἰγῶν ·
22.136 οὔ πως ἔστʹ , Ἀγέλαε διοτρεφές · ἄγχι γὰρ αἰνῶς
22.137 αὐλῆς καλὰ θύρετρα καὶ ἀργαλέον στόμα λαύρης ·
22.138 καί χʹ εἷς πάντας ἐρύκοι ἀνήρ , ὅς τʹ ἄλκιμος εἴη .
22.139 ἀλλʹ ἄγεθʹ , ὑμῖν τεύχεʹ ἐνείκω θωρηχθῆναι
22.140 ἐκ θαλάμου · ἔνδον γάρ , ὀΐομαι , οὐδέ πη ἄλλῃ
22.141 τεύχεα κατθέσθην Ὀδυσεὺς καὶ φαίδιμος υἱός .
22.142 ὣς εἰπὼν ἀνέβαινε Μελάνθιος , αἰπόλος αἰγῶν ,
22.143 εἰς θαλάμους Ὀδυσῆος ἀνὰ ῥῶγας μεγάροιο .
22.144 ἔνθεν δώδεκα μὲν σάκεʹ ἔξελε , τόσσα δὲ δοῦρα