21.177 πὰρ δὲ τίθει δίφρον τε μέγαν καὶ κῶας ἐπʹ αὐτοῦ ,
21.178 ἐκ δὲ στέατος ἔνεικε μέγαν τροχὸν ἔνδον ἐόντος ,
21.179 ὄφρα νέοι θάλποντες , ἐπιχρίοντες ἀλοιφῇ ,
21.180 τόξου πειρώμεσθα καὶ ἐκτελέωμεν ἄεθλον .
21.181 ὣς φάθʹ , ὁ δʹ αἶψʹ ἀνέκαιε Μελάνθιος ἀκάματον πῦρ ,
21.182 πὰρ δὲ φέρων δίφρον θῆκεν καὶ κῶας ἐπʹ αὐτοῦ ,
21.183 ἐκ δὲ στέατος ἔνεικε μέγαν τροχὸν ἔνδον ἐόντος ·
21.184 τῷ ῥα νέοι θάλποντες ἐπειρῶντʹ · οὐδʹ ἐδύναντο
21.185 ἐντανύσαι , πολλὸν δὲ βίης ἐπιδευέες ἦσαν .
21.186 Ἀντίνοος δʹ ἔτʹ ἐπεῖχε καὶ Εὐρύμαχος θεοειδής ,
21.187 ἀρχοὶ μνηστήρων · ἀρετῇ δʹ ἔσαν ἔξοχʹ ἄριστοι .
21.188 τὼ δʹ ἐξ οἴκου βῆσαν ὁμαρτήσαντες ἅμʹ ἄμφω
21.189 βουκόλος ἠδὲ συφορβὸς Ὀδυσσῆος θείοιο ·
21.190 ἐκ δʹ αὐτὸς μετὰ τοὺς δόμου ἤλυθε δῖος Ὀδυσσεύς .
21.191 ἀλλʹ ὅτε δή ῥʹ ἐκτὸς θυρέων ἔσαν ἠδὲ καὶ αὐλῆς ,
21.192 φθεγξάμενός σφε ἔπεσσι προσηύδα μειλιχίοισι ·
21.193 βουκόλε καὶ σύ , συφορβέ , ἔπος τί κε μυθησαίμην ,
21.194 ἦ αὐτὸς κεύθω ; φάσθαι δέ με θυμὸς ἀνώγει .
21.195 ποῖοί κʹ εἶτʹ Ὀδυσῆϊ ἀμυνέμεν , εἴ ποθεν ἔλθοι
21.196 ὧδε μάλʹ ἐξαπίνης καί τις θεὸς αὐτὸν ἐνείκαι ;
21.197 ἤ κε μνηστήρεσσιν ἀμύνοιτʹ ἦ Ὀδυσῆϊ ;
21.198 εἴπαθʹ ὅπως ὑμέας κραδίη θυμός τε κελεύει .
21.199 τὸν δʹ αὖτε προσέειπε βοῶν ἐπιβουκόλος ἀνήρ ·
21.200 Ζεῦ πάτερ , αἲ γὰρ τοῦτο τελευτήσειας ἐέλδωρ ,
21.201 ὡς ἔλθοι μὲν κεῖνος ἀνήρ , ἀγάγοι δέ ἑ δαίμων ·
21.202 γνοίης χʹ οἵη ἐμὴ δύναμις καὶ χεῖρες ἕπονται .
21.203 ὣς δʹ αὔτως Εὔμαιος ἐπεύχετο πᾶσι θεοῖσι
21.204 νοστῆσαι Ὀδυσῆα πολύφρονα ὅνδε δόμονδε .
21.205 αὐτὰρ ἐπεὶ δὴ τῶν γε νόον νημερτέʹ ἀνέγνω ,