21.121 πᾶσι μίαν μακρήν , καὶ ἐπὶ στάθμην ἴθυνεν ,
21.122 ἀμφὶ δὲ γαῖαν ἔναξε · τάφος δʹ ἕλε πάντας ἰδόντας ,
21.123 ὡς εὐκόσμως στῆσε · πάρος δʹ οὐ πώ ποτʹ ὀπώπει .
21.124 στῆ δʹ ἄρʹ ἐπʹ οὐδὸν ἰὼν καὶ τόξου πειρήτιζε .
21.125 τρὶς μέν μιν πελέμιξεν ἐρύσσεσθαι μενεαίνων ,
21.126 τρὶς δὲ μεθῆκε βίης , ἐπιελπόμενος τό γε θυμῷ ,
21.127 νευρὴν ἐντανύειν διοϊστεύσειν τε σιδήρου .
21.128 καί νύ κε δή ῥʹ ἐτάνυσσε βίῃ τὸ τέταρτον ἀνέλκων ,
21.129 ἀλλʹ Ὀδυσεὺς ἀνένευε καὶ ἔσχεθεν ἱέμενόν περ .
21.130 τοῖς δʹ αὖτις μετέειφʹ ἱερὴ ἲς Τηλεμάχοιο ·
21.131 ὢ πόποι , ἦ καὶ ἔπειτα κακός τʹ ἔσομαι καὶ ἄκικυς ,
21.132 ἠὲ νεώτερός εἰμι καὶ οὔ πω χερσὶ πέποιθα
21.133 ἄνδρʹ ἀπαμύνασθαι , ὅτε τις πρότερος χαλεπήνῃ .
21.134 ἀλλʹ ἄγεθʹ , οἵ περ ἐμεῖο βίῃ προφερέστεροί ἐστε ,
21.135 τόξου πειρήσασθε , καὶ ἐκτελέωμεν ἄεθλον .
21.136 ὣς εἰπὼν τόξον μὲν ἀπὸ ἕο θῆκε χαμᾶζε ,
21.137 κλίνας κολλητῇσιν ἐϋξέστῃς σανίδεσσιν ,
21.138 αὐτοῦ δʹ ὠκὺ βέλος καλῇ προσέκλινε κορώνῃ ,
21.139 ἂψ δʹ αὖτις κατʹ ἄρʹ ἕζετʹ ἐπὶ θρόνου ἔνθεν ἀνέστη .
21.140 τοῖσιν δʹ Ἀντίνοος μετέφη , Εὐπείθεος υἱός ·
21.141 ὄρνυσθʹ ἑξείης ἐπιδέξια πάντες ἑταῖροι ,
21.142 ἀρξάμενοι τοῦ χώρου ὅθεν τέ περ οἰνοχοεύει .
21.143 ὣς ἔφατʹ Ἀντίνοος , τοῖσιν δʹ ἐπιήνδανε μῦθος .
21.144 Λειώδης δὲ πρῶτος ἀνίστατο , Οἴνοπος υἱός ,
21.145 ὅ σφι θυοσκόος ἔσκε , παρὰ κρητῆρα δὲ καλὸν
21.146 ἷζε μυχοίτατος αἰέν · ἀτασθαλίαι δέ οἱ οἴῳ
21.147 ἐχθραὶ ἔσαν , πᾶσιν δὲ νεμέσσα μνηστήρεσσιν ·
21.148 ὅς ῥα τότε πρῶτος τόξον λάβε καὶ βέλος ὠκύ .