21.1 τῇ δʹ ἄρʹ ἐπὶ φρεσὶ θῆκε θεὰ γλαυκῶπις Ἀθήνη ,
21.2 κούρῃ Ἰκαρίοιο , περίφρονι Πηνελοπείῃ ,
21.3 τόξον μνηστήρεσσι θέμεν πολιόν τε σίδηρον
21.4 ἐν μεγάροις Ὀδυσῆος , ἀέθλια καὶ φόνου ἀρχήν .
21.5 κλίμακα δʹ ὑψηλὴν προσεβήσετο οἷο δόμοιο ,
21.6 εἵλετο δὲ κληῗδʹ εὐκαμπέα χειρὶ παχείῃ
21.7 καλὴν χαλκείην · κώπη δʹ ἐλέφαντος ἐπῆεν .
21.8 βῆ δʹ ἴμεναι θάλαμόνδε σὺν ἀμφιπόλοισι γυναιξὶν
21.9 ἔσχατον · ἔνθα δέ οἱ κειμήλια κεῖτο ἄνακτος ,
21.10 χαλκός τε χρυσός τε πολύκμητός τε σίδηρος .
21.11 ἔνθα δὲ τόξον κεῖτο παλίντονον ἠδὲ φαρέτρη
21.12 ἰοδόκος , πολλοὶ δʹ ἔνεσαν στονόεντες ὀϊστοί ,
21.13 δῶρα τά οἱ ξεῖνος Λακεδαίμονι δῶκε τυχήσας
21.14 Ἴφιτος Εὐρυτίδης , ἐπιείκελος ἀθανάτοισι .
21.15 τὼ δʹ ἐν Μεσσήνῃ ξυμβλήτην ἀλλήλοιϊν
21.16 οἴκῳ ἐν Ὀρτιλόχοιο δαΐφρονος . ἦ τοι Ὀδυσσεὺς
21.17 ἦλθε μετὰ χρεῖος , τό ῥά οἱ πᾶς δῆμος ὄφελλε ·
21.18 μῆλα γὰρ ἐξ Ἰθάκης Μεσσήνιοι ἄνδρες ἄειραν
21.19 νηυσὶ πολυκλήϊσι τριηκόσιʹ ἠδὲ νομῆας .
21.20 τῶν ἕνεκʹ ἐξεσίην πολλὴν ὁδὸν ἦλθεν Ὀδυσσεὺς
21.21 παιδνὸς ἐών · πρὸ γὰρ ἧκε πατὴρ ἄλλοι τε γέροντες .
21.22 Ἴφιτος αὖθʹ ἵππους διζήμενος , αἵ οἱ ὄλοντο
21.23 δώδεκα θήλειαι , ὑπὸ δʹ ἡμίονοι ταλαεργοί ·
21.24 αἳ δή οἱ καὶ ἔπειτα φόνος καὶ μοῖρα γένοντο ,
21.25 ἐπεὶ δὴ Διὸς υἱὸν ἀφίκετο καρτερόθυμον ,
21.26 φῶθʹ Ἡρακλῆα , μεγάλων ἐπιίστορα ἔργων ,
21.27 ὅς μιν ξεῖνον ἐόντα κατέκτανεν ᾧ ἐνὶ οἴκῳ ,
21.28 σχέτλιος , οὐδὲ θεῶν ὄπιν ᾐδέσατʹ οὐδὲ τράπεζαν ,
21.29 τὴν ἥν οἱ παρέθηκεν · ἔπειτα δὲ πέφνε καὶ αὐτόν ,
21.30 ἵππους δʹ αὐτὸς ἔχε κρατερώνυχας ἐν μεγάροισι .
21.31 τὰς ἐρέων Ὀδυσῆϊ συνήντετο , δῶκε δὲ τόξον ,