20.263 κερτομίας δέ τοι αὐτὸς ἐγὼ καὶ χεῖρας ἀφέξω
20.264 πάντων μνηστήρων , ἐπεὶ οὔ τοι δήμιός ἐστιν
20.265 οἶκος ὅδʹ , ἀλλʹ Ὀδυσῆος , ἐμοὶ δʹ ἐκτήσατο κεῖνος .
20.266 ὑμεῖς δέ , μνηστῆρες , ἐπίσχετε θυμὸν ἐνιπῆς
20.267 καὶ χειρῶν , ἵνα μή τις ἔρις καὶ νεῖκος ὄρηται .
20.268 ὣς ἔφαθʹ , οἱ δʹ ἄρα πάντες ὀδὰξ ἐν χείλεσι φύντες
20.269 Τηλέμαχον θαύμαζον , ὃ θαρσαλέως ἀγόρευε .
20.270 τοῖσιν δʹ Ἀντίνοος μετέφη , Εὐπείθεος υἱός ·
20.271 καὶ χαλεπόν περ ἐόντα δεχώμεθα μῦθον , Ἀχαιοί ,
20.272 Τηλεμάχου · μάλα δʹ ἧμιν ἀπειλήσας ἀγορεύει .
20.273 οὐ γὰρ Ζεὺς εἴασε Κρονίων · τῷ κέ μιν ἤδη
20.274 παύσαμεν ἐν μεγάροισι , λιγύν περ ἐόντʹ ἀγορητήν .
20.275 ὣς ἔφατʹ Ἀντίνοος · ὁ δʹ ἄρʹ οὐκ ἐμπάζετο μύθων .
20.276 κήρυκες δʹ ἀνὰ ἄστυ θεῶν ἱερὴν ἑκατόμβην
20.277 ἦγον · τοὶ δʹ ἀγέροντο κάρη κομόωντες Ἀχαιοὶ
20.278 ἄλσος ὕπο σκιερὸν ἑκατηβόλου Ἀπόλλωνος .
20.279 οἱ δʹ ἐπεὶ ὤπτησαν κρέʹ ὑπέρτερα καὶ ἐρύσαντο ,
20.280 μοίρας δασσάμενοι δαίνυντʹ ἐρικυδέα δαῖτα ·
20.281 πὰρ δʹ ἄρʹ Ὀδυσσῆϊ μοῖραν θέσαν οἳ πονέοντο
20.282 ἴσην , ὡς αὐτοί περ ἐλάγχανον · ὣς γὰρ ἀνώγει
20.283 Τηλέμαχος , φίλος υἱὸς Ὀδυσσῆος θείοιο .
20.284 μνηστῆρας δʹ οὐ πάμπαν ἀγήνορας εἴα Ἀθήνη
20.285 λώβης ἴσχεσθαι θυμαλγέος , ὄφρʹ ἔτι μᾶλλον
20.286 δύη ἄχος κραδίην Λαερτιάδην Ὀδυσῆα .
20.287 ἦν δέ τις ἐν μνηστῆρσιν ἀνὴρ ἀθεμίστια εἰδώς ,
20.288 Κτήσιππος δʹ ὄνομʹ ἔσκε , Σάμῃ δʹ ἐνὶ οἰκία ναῖεν ·
20.289 ὃς δή τοι κτεάτεσσι πεποιθὼς θεσπεσίοισι
20.290 μνάσκετʹ Ὀδυσσῆος δὴν οἰχομένοιο δάμαρτα .
20.291 ὅς ῥα τότε μνηστῆρσιν ὑπερφιάλοισι μετηύδα ·
20.292 κέκλυτέ μευ , μνηστῆρες ἀγήνορες , ὄφρα τι εἴπω ·