20.174 αἶγας ἄγων αἳ πᾶσι μετέρεπον αἰπολίοισι ,
20.175 δεῖπνον μνηστήρεσσι . δύω δʹ ἅμʹ ἕποντο νομῆες .
20.176 καὶ τὰς μὲν κατέδησεν ὑπʹ αἰθούσῃ ἐριδούπῳ ,
20.177 αὐτὸς δʹ αὖτʹ Ὀδυσῆα προσηύδα κερτομίοισι ·
20.178 ξεῖνʹ , ἔτι καὶ νῦν ἐνθάδʹ ἀνιήσεις κατὰ δῶμα
20.179 ἀνέρας αἰτίζων , ἀτὰρ οὐκ ἔξεισθα θύραζε ;
20.180 πάντως οὐκέτι νῶϊ διακρινέεσθαι ὀΐω
20.181 πρὶν χειρῶν γεύσασθαι , ἐπεὶ σύ περ οὐ κατὰ κόσμον
20.182 αἰτίζεις · εἰσὶν δὲ καὶ ἄλλαι δαῖτες Ἀχαιῶν .
20.183 ὣς φάτο , τὸν δʹ οὔ τι προσέφη πολύμητις Ὀδυσσεύς ,
20.184 ἀλλʹ ἀκέων κίνησε κάρη , κακὰ βυσσοδομεύων .
20.185 τοῖσι δʹ ἐπὶ τρίτος ἦλθε Φιλοίτιος , ὄρχαμος ἀνδρῶν ,
20.186 βοῦν στεῖραν μνηστῆρσιν ἄγων καὶ πίονας αἶγας .
20.187 πορθμῆες δʹ ἄρα τούς γε διήγαγον , οἵ τε καὶ ἄλλους
20.188 ἀνθρώπους πέμπουσιν , ὅτις σφέας εἰσαφίκηται .
20.189 καὶ τὰ μὲν εὖ κατέδησεν ὑπʹ αἰθούσῃ ἐριδούπῳ ,
20.190 αὐτὸς δʹ αὖτʹ ἐρέεινε συβώτην ἄγχι παραστάς ·
20.191 τίς δὴ ὅδε ξεῖνος νέον εἰλήλουθε , συβῶτα ,
20.192 ἡμέτερον πρὸς δῶμα ; τέων δʹ ἐξ εὔχεται εἶναι
20.193 ἀνδρῶν ; ποῦ δέ νύ οἱ γενεὴ καὶ πατρὶς ἄρουρα ;
20.194 δύσμορος , ἦ τε ἔοικε δέμας βασιλῆϊ ἄνακτι ·
20.195 ἀλλὰ θεοὶ δυόωσι πολυπλάγκτους ἀνθρώπους ,
20.196 ὁππότε καὶ βασιλεῦσιν ἐπικλώσωνται ὀϊζύν .
20.197 ἦ καὶ δεξιτερῇ δειδίσκετο χειρὶ παραστάς ,
20.198 καί μιν φωνήσας ἔπεα πτερόεντα προσηύδα ·
20.199 χαῖρε , πάτερ ὦ ξεῖνε · γένοιτό τοι ἔς περ ὀπίσσω
20.200 ὄλβος · ἀτὰρ μὲν νῦν γε κακοῖς ἔχεαι πολέεσσι .
20.201 Ζεῦ πάτερ , οὔ τις σεῖο θεῶν ὀλοώτερος ἄλλος ·
20.202 οὐκ ἐλεαίρεις ἄνδρας , ἐπὴν δὴ γείνεαι αὐτός ,