20.145 ἔγχος ἔχων , ἅμα τῷ γε δύω κύνες ἀργοὶ ἕποντο .
20.146 βῆ δʹ ἴμεν εἰς ἀγορὴν μετʹ ἐϋκνήμιδας Ἀχαιούς .
20.147 ἡ δʹ αὖτε δμῳῇσιν ἐκέκλετο δῖα γυναικῶν ,
20.148 Εὐρύκλειʹ , Ὦπος θυγάτηρ Πεισηνορίδαο ·
20.149 ἀγρεῖθʹ , αἱ μὲν δῶμα κορήσατε ποιπνύσασαι ,
20.150 ῥάσσατέ τʹ , ἔν τε θρόνοις εὐποιήτοισι τάπητας
20.151 βάλλετε πορφυρέους · αἱ δὲ σπόγγοισι τραπέζας
20.152 πάσας ἀμφιμάσασθε , καθήρατε δὲ κρητῆρας
20.153 καὶ δέπα ἀμφικύπελλα τετυγμένα · ταὶ δὲ μεθʹ ὕδωρ
20.154 ἔρχεσθε κρήνηνδε , καὶ οἴσετε θᾶσσον ἰοῦσαι .
20.155 οὐ γὰρ δὴν μνηστῆρες ἀπέσσονται μεγάροιο ,
20.156 ἀλλὰ μάλʹ ἦρι νέονται , ἐπεὶ καὶ πᾶσιν ἑορτή .
20.157 ὣς ἔφαθʹ , αἱ δʹ ἄρα τῆς μάλα μὲν κλύον ἠδʹ ἐπίθοντο .
20.158 αἱ μὲν ἐείκοσι βῆσαν ἐπὶ κρήνην μελάνυδρον ,
20.159 αἱ δʹ αὐτοῦ κατὰ δώματʹ ἐπισταμένως πονέοντο .
20.160 ἐς δʹ ἦλθον δρηστῆρες Ἀχαιῶν . οἱ μὲν ἔπειτα
20.161 εὖ καὶ ἐπισταμένως κέασαν ξύλα , ταὶ δὲ γυναῖκες
20.162 ἦλθον ἀπὸ κρήνης · ἐπὶ δέ σφισιν ἦλθε συβώτης
20.163 τρεῖς σιάλους κατάγων , οἳ ἔσαν μετὰ πᾶσιν ἄριστοι .
20.164 καὶ τοὺς μέν ῥʹ εἴασε καθʹ ἕρκεα καλὰ νέμεσθαι ,
20.165 αὐτὸς δʹ αὖτʹ Ὀδυσῆα προσηύδα μειλιχίοισι ·
20.166 ξεῖνʹ , ἦ ἄρ τί σε μᾶλλον Ἀχαιοὶ εἰσορόωσιν ,
20.167 ἦέ σʹ ἀτιμάζουσι κατὰ μέγαρʹ , ὡς τὸ πάρος περ ;
20.168 τὸν δʹ ἀπαμειβόμενος προσέφη πολυμήτις Ὀδυσσεύς ·
20.169 αἲ γὰρ δή , Εὔμαιε , θεοὶ τισαίατο λώβην ,
20.170 ἣν οἵδʹ ὑβρίζοντες ἀτάσθαλα μηχανόωνται
20.171 οἴκῳ ἐν ἀλλοτρίῳ , οὐδʹ αἰδοῦς μοῖραν ἔχουσιν .
20.172 ὣς οἱ μὲν τοιαῦτα πρὸς ἀλλήλους ἀγόρευον ,
20.173 ἀγχίμολον δέ σφʹ ἦλθε Μελάνθιος , αἰπόλος αἰγῶν .