20.116 μνηστῆρες πύματόν τε καὶ ὕστατον ἤματι τῷδε
20.117 ἐν μεγάροις Ὀδυσῆος ἑλοίατο δαῖτʹ ἐρατεινήν ,
20.118 οἳ δή μοι καμάτῳ θυμαλγέι · γούνατʹ ἔλυσαν
20.119 ἄλφιτα τευχούσῃ · νῦν ὕστατα δειπνήσειαν .
20.120 ὣς ἄρʹ ἔφη , χαῖρεν δὲ κλεηδόνι δῖος Ὀδυσσεὺς
20.121 Ζηνός τε βροντῇ · φάτο γὰρ τίσασθαι ἀλείτας .
20.122 αἱ δʹ ἄλλαι δμῳαὶ κατὰ δώματα κάλʹ Ὀδυσῆος
20.123 ἀγρόμεναι ἀνέκαιον ἐπʹ ἐσχάρῃ ἀκάματον πῦρ .
20.124 Τηλέμαχος δʹ εὐνῆθεν ἀνίστατο , ἰσόθεος φώς ,
20.125 εἵματα ἑσσάμενος · περὶ δὲ ξίφος ὀξὺ θέτʹ ὤμῳ ·
20.126 ποσσὶ δʹ ὑπὸ λιπαροῖσιν ἐδήσατο καλὰ πέδιλα ,
20.127 εἵλετο δʹ ἄλκιμον ἔγχος , ἀκαχμένον ὀξέι · χαλκῷ ·
20.128 στῆ δʹ ἄρʹ ἐπʹ οὐδὸν ἰών , πρὸς δʹ Εὐρύκλειαν ἔειπε ·
20.129 μαῖα φίλη , τὸν ξεῖνον ἐτιμήσασθʹ ἐνὶ οἴκῳ
20.130 εὐνῇ καὶ σίτῳ , ἦ αὔτως κεῖται ἀκηδής ;
20.131 τοιαύτη γὰρ ἐμὴ μήτηρ , πινυτή περ ἐοῦσα ·
20.132 ἐμπλήγδην ἕτερόν γε τίει μερόπων ἀνθρώπων
20.133 χείρονα , τὸν δέ τʹ ἀρείονʹ ἀτιμήσασʹ ἀποπέμπει .
20.134 τὸν δʹ αὖτε προσέειπε περίφρων Εὐρύκλεια ·
20.135 οὐκ ἄν μιν νῦν , τέκνον , ἀναίτιον αἰτιόῳο .
20.136 οἶνον μὲν γὰρ πῖνε καθήμενος , ὄφρʹ ἔθελʹ αὐτός ,
20.137 σίτου δʹ οὐκέτʹ ἔφη πεινήμεναι · εἴρετο γάρ μιν .
20.138 ἀλλʹ ὅτε δὴ κοίτοιο καὶ ὕπνου μιμνήσκοιτο ,
20.139 ἡ μὲν δέμνιʹ ἄνωγεν ὑποστορέσαι δμῳῇσιν ,
20.140 αὐτὰρ ὅ γʹ , ὥς τις πάμπαν ὀϊζυρὸς καὶ ἄποτμος ,
20.141 οὐκ ἔθελʹ ἐν λέκτροισι καὶ ἐν ῥήγεσσι καθεύδειν ,
20.142 ἀλλʹ ἐν ἀδεψήτῳ βοέῃ καὶ κώεσιν οἰῶν
20.143 ἔδραθʹ ἐνὶ προδόμῳ · χλαῖναν δʹ ἐπιέσσαμεν ἡμεῖς .
20.144 ὣς φάτο , Τηλέμαχος δὲ διὲκ μεγάροιο βεβήκει