19.61 αἱ δʹ ἀπὸ μὲν σῖτον πολὺν ᾕρεον ἠδὲ τραπέζας
19.62 καὶ δέπα , ἔνθεν ἄρʹ ἄνδρες ὑπερμενέοντες ἔπινον ·
19.63 πῦρ δʹ ἀπὸ λαμπτήρων χαμάδις βάλον , ἄλλα δʹ ἐπʹ αὐτῶν
19.64 νήησαν ξύλα πολλά , φόως ἔμεν ἠδὲ θέρεσθαι .
19.65 ἡ δʹ Ὀδυσῆʹ ἐνένιπε Μελανθὼ δεύτερον αὖτις ·
19.66 ξεῖνʹ , ἔτι καὶ νῦν ἐνθάδʹ ἀνιήσεις διὰ νύκτα
19.67 δινεύων κατὰ οἶκον , ὀπιπεύσεις δὲ γυναῖκας ;
19.68 ἀλλʹ ἔξελθε θύραζε , τάλαν , καὶ δαιτὸς ὄνησο ·
19.69 ἢ τάχα καὶ δαλῷ βεβλημένος εἶσθα θύραζε .
19.70 τὴν δʹ ἄρʹ ὑπόδρα ἰδὼν προσέφη πολύμητις Ὀδυσσεύς ·
19.71 δαιμονίη , τί μοι ὧδʹ ἐπέχεις κεκοτηότι θυμῷ ;
19.72 ἦ ὅτι δὴ ῥυπόω , κακὰ δὲ χροῒ εἵματα εἷμαι ,
19.73 πτωχεύω δʹ ἀνὰ δῆμον ; ἀναγκαίη γὰρ ἐπείγει .
19.74 τοιοῦτοι πτωχοὶ καὶ ἀλήμονες ἄνδρες ἔασι
19.75 καὶ γὰρ ἐγώ ποτε οἶκον ἐν ἀνθρώποισιν ἔναιον
19.76 ὄλβιος ἀφνειὸν καὶ πολλάκι δόσκον ἀλήτῃ ,
19.77 τοίῳ ὁποῖος ἔοι καὶ ὅτευ κεχρημένος ἔλθοι ·
19.78 ἦσαν δὲ δμῶες μάλα μυρίοι , ἄλλα τε πολλὰ
19.79 οἷσίν τʹ εὖ ζώουσι καὶ ἀφνειοὶ καλέονται .
19.80 ἀλλὰ Ζεὺς ἀλάπαξε Κρονίων · ἤθελε γάρ που ·
19.81 τῷ νῦν μήποτε καὶ σύ , γύναι , ἀπὸ πᾶσαν ὀλέσσῃς
19.82 ἀγλαΐην , τῇ νῦν γε μετὰ δμῳῇσι κέκασσαι ·
19.83 μή πώς τοι δέσποινα κοτεσσαμένη χαλεπήνῃ ,
19.84 ἢ Ὀδυσεὺς ἔλθῃ · ἔτι γὰρ καὶ ἐλπίδος αἶσα .
19.85 εἰ δʹ ὁ μὲν ὣς ἀπόλωλε καὶ οὐκέτι νόστιμός ἐστιν ,
19.86 ἀλλʹ ἤδη παῖς τοῖος Ἀπόλλωνός γε ἕκητι ,
19.87 Τηλέμαχος · τὸν δʹ οὔ τις ἐνὶ μεγάροισι γυναικῶν
19.88 λήθει ἀτασθάλλουσʹ , ἐπεὶ οὐκέτι τηλίκος ἐστίν .