19.31 τὼ δʹ ἄρʹ ἀναΐξαντʹ Ὀδυσεὺς καὶ φαίδιμος υἱὸς
19.32 ἐσφόρεον κόρυθάς τε καὶ ἀσπίδας ὀμφαλοέσσας
19.33 ἔγχεά τʹ ὀξυόεντα · πάροιθε δὲ Παλλὰς Ἀθήνη ,
19.34 χρύσεον λύχνον ἔχουσα , φάος περικαλλὲς ἐποίει .
19.35 δὴ τότε Τηλέμαχος προσεφώνεεν ὃν πατέρʹ αἶψα ·
19.36 ὦ πάτερ , ἦ μέγα θαῦμα τόδʹ ὀφθαλμοῖσιν ὁρῶμαι .
19.37 ἔμπης μοι τοῖχοι μεγάρων καλαί τε μεσόδμαι ,
19.38 εἰλάτιναί τε δοκοί , καὶ κίονες ὑψόσʹ ἔχοντες
19.39 φαίνοντʹ ὀφθαλμοῖς ὡς εἰ πυρὸς αἰθομένοιο .
19.40 ἦ μάλα τις θεὸς ἔνδον , οἳ οὐρανὸν εὐρὺν ἔχουσι .
19.41 τὸν δʹ ἀπαμειβόμενος προσέφη πολύμητις Ὀδυσσεύς ·
19.42 σίγα καὶ κατὰ σὸν νόον ἴσχανε μηδʹ ἐρέεινε ·
19.43 αὕτη τοι δίκη ἐστὶ θεῶν , οἳ Ὄλυμπον ἔχουσιν .
19.44 ἀλλὰ σὺ μὲν κατάλεξαι , ἐγὼ δʹ ὑπολείψομαι αὐτοῦ ,
19.45 ὄφρα κʹ ἔτι δμῳὰς καὶ μητέρα σὴν ἐρεθίζω ·
19.46 ἡ δέ μʹ ὀδυρομένη εἰρήσεται ἀμφὶς ἕκαστα .
19.47 ὣς φάτο , Τηλέμαχος δὲ διὲκ μεγάροιο βεβήκει
19.48 κείων ἐς θάλαμον , δαΐδων ὕπο λαμπομενάων ,
19.49 ἔνθα πάρος κοιμᾶθʹ , ὅτε μιν γλυκὺς ὕπνος ἱκάνοι ·
19.50 ἔνθʹ ἄρα καὶ τότʹ ἔλεκτο καὶ Ἠῶ δῖαν ἔμιμνεν .
19.51 αὐτὰρ ὁ ἐν μεγάρῳ ὑπελείπετο δῖος Ὀδυσσεύς ,
19.52 μνηστήρεσσι φόνον σὺν Ἀθήνῃ μερμηρίζων .
19.53 ἡ δʹ ἴεν ἐκ θαλάμοιο περίφρων Πηνελόπεια ,
19.54 Ἀρτέμιδι ἰκέλη ἠὲ χρυσέῃ Ἀφροδίτῃ .
19.55 τῇ παρὰ μὲν κλισίην πυρὶ κάτθεσαν , ἔνθʹ ἄρʹ ἐφῖζε ,
19.56 δινωτὴν ἐλέφαντι καὶ ἀργύρῳ · ἥν ποτε τέκτων
19.57 ποίησʹ Ἰκμάλιος , καὶ ὑπὸ θρῆνυν ποσὶν ἧκε
19.58 προσφυέʹ ἐξ αὐτῆς , ὅθʹ ἐπὶ μέγα βάλλετο κῶας .
19.59 ἔνθα καθέζετʹ ἔπειτα περίφρων Πηνελόπεια .
19.60 ἦλθον δὲ δμῳαὶ λευκώλενοι ἐκ μεγάροιο .