19.1 αὐτὰρ ὁ ἐν μεγάρῳ ὑπελείπετο δῖος Ὀδυσσεύς ,
19.2 μνηστήρεσσι φόνον σὺν Ἀθήνῃ μερμηρίζων ·
19.3 αἶψα δὲ Τηλέμαχον ἔπεα πτερόεντα προσηύδα ·
19.4 Τηλέμαχε , χρὴ τεύχεʹ ἀρήϊα κατθέμεν εἴσω
19.5 πάντα μάλʹ · αὐτὰρ μνηστῆρας μαλακοῖς ἐπέεσσι
19.6 παρφάσθαι , ὅτε κέν σε μεταλλῶσιν ποθέοντες ·
19.7 ἐκ καπνοῦ κατέθηκʹ , ἐπεὶ οὐκέτι τοῖσιν ἐῴκει
19.8 οἷά ποτε Τροίηνδε κιὼν κατέλειπεν Ὀδυσσεύς ,
19.9 ἀλλὰ κατῄκισται , ὅσσον πυρὸς ἵκετʹ ἀϋτμή .
19.10 πρὸς δʹ ἔτι καὶ τόδε μεῖζον ἐνὶ φρεσὶν ἔβαλε δαίμων
19.11 μή πως οἰνωθέντες , ἔριν στήσαντες ἐν ὑμῖν ,
19.12 ἀλλήλους τρώσητε καταισχύνητέ τε δαῖτα
19.13 καὶ μνηστύν · αὐτὸς γὰρ ἐφέλκεται ἄνδρα σίδηρος .
19.14 ὣς φάτο , Τηλέμαχος δὲ φίλῳ ἐπεπείθετο πατρί ,
19.15 ἐκ δὲ καλεσσάμενος προσέφη τροφὸν Εὐρύκλειαν ·
19.16 μαῖʹ , ἄγε δή μοι ἔρυξον ἐνὶ μεγάροισι γυναῖκας ,
19.17 ὄφρα κεν ἐς θάλαμον καταθείομαι ἔντεα πατρὸς
19.18 καλά , τά μοι κατὰ οἶκον ἀκηδέα καπνὸς ἀμέρδει
19.19 πατρὸς ἀποιχομένοιο · ἐγὼ δʹ ἔτι νήπιος ἦα .
19.20 νῦν δʹ ἐθέλω καταθέσθαι , ἵνʹ οὐ πυρὸς ἵξετʹ ἀϋτμή .
19.21 τὸν δʹ αὖτε προσέειπε φίλη τροφὸς Εὐρύκλεια ·
19.22 αἲ γὰρ δή ποτε , τέκνον , ἐπιφροσύνας ἀνέλοιο
19.23 οἴκου κήδεσθαι καὶ κτήματα πάντα φυλάσσειν .
19.24 ἀλλʹ ἄγε , τίς τοι ἔπειτα μετοιχομένη φάος οἴσει ;
19.25 δμῳὰς δʹ οὐκ εἴας προβλωσκέμεν , αἵ κεν ἔφαινον .
19.26 τὴν δʹ αὖ Τηλέμαχος πεπνυμένος ἀντίον ηὔδα ·
19.27 ξεῖνος ὅδʹ · οὐ γὰρ ἀεργὸν ἀνέξομαι ὅς κεν ἐμῆς γε
19.28 χοίνικος ἅπτηται , καὶ τηλόθεν εἰληλουθώς .
19.29 ὣς ἄρʹ ἐφώνησεν , τῇ δʹ ἄπτερος ἔπλετο μῦθος .
19.30 κλήϊσεν δὲ θύρας μεγάρων εὖ ναιεταόντων .