16.200 νῦν δὲ θεοῖσιν ἔοικας , οἳ οὐρανὸν εὐρὺν ἔχουσι .
16.201 τὸν δʹ ἀπαμειβόμενος προσέφη πολύμητις Ὀδυσσεύς ·
16.202 Τηλέμαχʹ , οὔ σε ἔοικε φίλον πατέρ ἔνδον ἐόντα
16.203 οὔτε τι θαυμάζειν περιώσιον οὔτʹ ἀγάασθαι ·
16.204 οὐ μὲν γάρ τοι ἔτʹ ἄλλος ἐλεύσεται ἐνθάδʹ Ὀδυσσεύς ,
16.205 ἀλλʹ ὅδʹ ἐγὼ τοιόσδε , παθὼν κακά , πολλὰ δʹ ἀληθείς ,
16.206 ἤλυθον εἰκοστῷ ἔτεϊ ἐς πατρίδα γαῖαν .
16.207 αὐτάρ τοι τόδε ἔργον Ἀθηναίης ἀγελείης ,
16.208 ἥ τέ με τοῖον ἔθηκεν , ὅπως ἐθέλει , δύναται γὰρ ,
16.209 ἄλλοτε μὲν πτωχῷ ἐναλίγκιον , ἄλλοτε δʹ αὖτε
16.210 ἀνδρὶ νέῳ καὶ καλὰ περὶ χροῒ εἵματʹ ἔχοντι .
16.211 ῥηΐδιον δὲ θεοῖσι , τοὶ οὐρανὸν εὐρὺν ἔχουσιν ,
16.212 ἠμὲν κυδῆναι θνητὸν βροτὸν ἠδὲ κακῶσαι .
16.213 ὣς ἄρα φωνήσας κατʹ ἄρʹ ἕζετο , Τηλέμαχος δὲ
16.214 ἀμφιχυθεὶς πατέρʹ ἐσθλὸν ὀδύρετο , δάκρυα λείβων ,
16.215 ἀμφοτέροισι δὲ τοῖσιν ὑφʹ ἵμερος ὦρτο γόοιο ·
16.216 κλαῖον δὲ λιγέως , ἀδινώτερον ἤ τʹ οἰωνοί ,
16.217 φῆναι ἢ αἰγυπιοὶ γαμψώνυχες , οἷσί τε τέκνα
16.218 ἀγρόται ἐξείλοντο πάρος πετεηνὰ γενέσθαι ·
16.219 ὣς ἄρα τοί γʹ ἐλεεινὸν ὑπʹ ὀφρύσι δάκρυον εἶβον .
16.220 καί νύ κʹ ὀδυρομένοισιν ἔδυ φάος ἠελίοιο ,
16.221 εἰ μὴ Τηλέμαχος προσεφώνεεν ὃν πατέρʹ αἶψα ·
16.222 ποίῃ γὰρ νῦν δεῦρο , πάτερ φίλε , νηΐ σε ναῦται
16.223 ἤγαγον εἰς Ἰθάκην ; τίνες ἔμμεναι εὐχετόωντο ;
16.224 οὐ μὲν γάρ τί σε πεζὸν ὀΐομαι ἐνθάδʹ ἱκέσθαι .
16.225 τὸν δʹ αὖτε προσέειπε πολύτλας δῖος Ὀδυσσεύς ·
16.226 τοιγὰρ ἐγώ τοι , τέκνον , ἀληθείην καταλέξω .
16.227 Φαίηκές μʹ ἄγαγον ναυσίκλυτοι , οἵ τε καὶ ἄλλους
16.228 ἀνθρώπους πέμπουσιν , ὅτις σφέας εἰσαφίκηται ·