15.92 αὐτὰρ ἐπεὶ τό γʹ ἄκουσε βοὴν ἀγαθὸς Μενέλαος ,
15.93 αὐτίκʹ ἄρʹ ᾗ ἀλόχῳ ἠδὲ δμῳῇσι κέλευσε
15.94 δεῖπνον ἐνὶ μεγάροις τετυκεῖν ἅλις ἔνδον ἐόντων .
15.95 ἀγχίμολον δέ οἱ ἦλθε Βοηθοΐδης Ἐτεωνεύς ,
15.96 ἀνστὰς ἐξ εὐνῆς , ἐπεὶ οὐ πολὺ ναῖεν ἀπʹ αὐτοῦ ·
15.97 τὸν πῦρ κῆαι ἄνωγε βοὴν ἀγαθὸς Μενέλαος
15.98 ὀπτῆσαί τε κρεῶν · ὁ δʹ ἄρʹ οὐκ ἀπίθησεν ἀκούσας .
15.99 αὐτὸς δʹ ἐς θάλαμον κατεβήσετο κηώεντα ,
15.100 οὐκ οἶος , ἅμα τῷ γʹ Ἑλένη κίε καὶ Μεγαπένθης .
15.101 ἀλλʹ ὅτε δή ῥʹ ἵκανον ὅθι κειμήλια κεῖτο ,
15.102 Ἀτρεΐδης μὲν ἔπειτα δέπας λάβεν ἀμφικύπελλον ,
15.103 υἱὸν δὲ κρητῆρα φέρειν Μεγαπένθεʹ ἄνωγεν
15.104 ἀργύρεον · Ἑλένη δὲ παρίστατο φωριαμοῖσιν ,
15.105 ἔνθʹ ἔσαν οἱ πέπλοι παμποίκιλοι , οὓς κάμεν αὐτή .
15.106 τῶν ἕνʹ ἀειραμένη Ἑλένη φέρε , δῖα γυναικῶν ,
15.107 ὃς κάλλιστος ἔην ποικίλμασιν ἠδὲ μέγιστος ,
15.108 ἀστὴρ δʹ ὣς ἀπέλαμπεν · ἔκειτο δὲ νείατος ἄλλων .
15.109 βὰν δʹ ἰέναι προτέρω διὰ δώματος , ἧος ἵκοντο
15.110 Τηλέμαχον · τὸν δὲ προσέφη ξανθὸς Μενέλαος ·
15.111 Τηλέμαχʹ , ἦ τοι νόστον , ὅπως φρεσὶ σῇσι μενοινᾷς ,
15.112 ὥς τοι Ζεὺς τελέσειεν , ἐρίγδουπος πόσις Ἥρης .
15.113 δώρων δʹ , ὅσσʹ ἐν ἐμῷ οἴκῳ κειμήλια κεῖται ,
15.114 δώσω ὃ κάλλιστον καὶ τιμηέστατόν ἐστι .
15.115 δώσω τοι κρητῆρα τετυγμένον · ἀργύρεος δὲ
15.116 ἐστὶν ἅπας , χρυσῷ δʹ ἐπὶ χείλεα κεκράανται ,
15.117 ἔργον δʹ Ἡφαίστοιο · πόρεν δέ ἑ Φαίδιμος ἥρως ,
15.118 Σιδονίων βασιλεύς , ὅθʹ ἑὸς δόμος ἀμφεκάλυψε
15.119 κεῖσέ με νοστήσαντα · τεῒν δʹ ἐθέλω τόδʹ ὀπάσσαι .
15.120 ὣς εἰπὼν ἐν χειρὶ τίθει δέπας ἀμφικύπελλον