15.121 ἥρως Ἀτρεΐδης · ὁ δʹ ἄρα κρητῆρα φαεινὸν
15.122 θῆκʹ αὐτοῦ προπάροιθε φέρων κρατερὸς Μεγαπένθης ,
15.123 ἀργύρεον · Ἑλένη δὲ παρίστατο καλλιπάρῃος
15.124 πέπλον ἔχουσʹ ἐν χερσίν , ἔπος τʹ ἔφατʹ ἔκ τʹ ὀνόμαζε ·
15.125 δῶρόν τοι καὶ ἐγώ , τέκνον φίλε , τοῦτο δίδωμι ,
15.126 μνῆμʹ Ἑλένης χειρῶν , πολυηράτου ἐς γάμου ὥρην ,
15.127 σῇ ἀλόχῳ φορέειν · τῆος δὲ φίλῃ παρὰ μητρὶ
15.128 κείσθω ἐνὶ μεγάρῳ . σὺ δέ μοι χαίρων ἀφίκοιο
15.129 οἶκον ἐϋκτίμενον καὶ σὴν ἐς πατρίδα γαῖαν .
15.130 ὣς εἰποῦσʹ ἐν χερσὶ τίθει , ὁ δʹ ἐδέξατο χαίρων .
15.131 καὶ τὰ μὲν ἐς πείρινθα τίθει Πεισίστρατος ἥρως
15.132 δεξάμενος , καὶ πάντα ἑῷ θηήσατο θυμῷ ·
15.133 τοὺς δʹ ἦγε πρὸς δῶμα κάρη ξανθὸς Μενέλαος .
15.134 ἑζέσθην δʹ ἄρʹ ἔπειτα κατὰ κλισμούς τε θρόνους τε .
15.135 χέρνιβα δʹ ἀμφίπολος προχόῳ ἐπέχευε φέρουσα
15.136 καλῇ χρυσείῃ , ὑπὲρ ἀργυρέοιο λέβητος ,
15.137 νίψασθαι · παρὰ δὲ ξεστὴν ἐτάνυσσε τράπεζαν .
15.138 σῖτον δʹ αἰδοίη ταμίη παρέθηκε φέρουσα ·
15.139 εἴδατα πόλλʹ ἐπιθεῖσα , χαριζομένη παρεόντων ·
15.140 πὰρ δὲ Βοηθοΐδης κρέα δαίετο καὶ νέμε μοίρας ·
15.141 οἰνοχόει δʹ υἱὸς Μενελάου κυδαλίμοιο .
15.142 οἱ δʹ ἐπʹ ὀνείαθʹ ἑτοῖμα προκείμενα χεῖρας ἴαλλον .
15.143 αὐτὰρ ἐπεὶ πόσιος καὶ ἐδητύος ἐξ ἔρον ἕντο ,
15.144 δὴ τότε Τηλέμαχος καὶ Νέστορος ἀγλαὸς υἱὸς
15.145 ἵππους τε ζεύγνυντʹ ἀνά θʹ ἅρματα ποικίλʹ ἔβαινον ,
15.146 ἐκ δʹ ἔλασαν προθύροιο καὶ αἰθούσης ἐριδούπου .
15.147 τοὺς δὲ μετʹ Ἀτρεΐδης ἔκιε ξανθὸς Μενέλαος ,
15.148 οἶνον ἔχων ἐν χειρὶ μελίφρονα δεξιτερῆφι ,
15.149 ἐν δέπαϊ χρυσέῳ , ὄφρα λείψαντε κιοίτην .
15.150 στῆ δʹ ἵππων προπάροιθε , δεδισκόμενος δὲ προσηύδα ·