15.63 Τηλέμαχος , φίλος υἱὸς Ὀδυσσῆος θείοιο ·
15.64 Ἀτρεΐδη Μενέλαε διοτρεφές , ὄρχαμε λαῶν ,
15.65 ἤδη νῦν μʹ ἀπόπεμπε φίλην ἐς πατρίδα γαῖαν ·
15.66 ἤδη γάρ μοι θυμὸς ἐέλδεται οἴκαδʹ ἱκέσθαι .
15.67 τὸν δʹ ἠμείβετʹ ἔπειτα βοὴν ἀγαθὸς Μενέλαος ·
15.68 Τηλέμαχʹ , οὔ τί σʹ ἐγώ γε πολὺν χρόνον ἐνθάδʹ ἐρύξω
15.69 ἱέμενον νόστοιο · νεμεσσῶμαι δὲ καὶ ἄλλῳ
15.70 ἀνδρὶ ξεινοδόκῳ , ὅς κʹ ἔξοχα μὲν φιλέῃσιν ,
15.71 ἔξοχα δʹ ἐχθαίρῃσιν · ἀμείνω δʹ αἴσιμα πάντα .
15.72 ἶσόν τοι κακόν ἐσθʹ , ὅς τʹ οὐκ ἐθέλοντα νέεσθαι
15.73 ξεῖνον ἐποτρύνει καὶ ὃς ἐσσύμενον κατερύκει .
15.74 χρὴ ξεῖνον παρεόντα φιλεῖν , ἐθέλοντα δὲ πέμπειν .
15.75 ἀλλὰ μένʹ εἰς ὅ κε δῶρα φέρων ἐπιδίφρια θείω
15.76 καλά , σὺ δʹ ὀφθαλμοῖσιν ἴδῃς , εἴπω δὲ γυναιξὶ
15.77 δεῖπνον ἐνὶ μεγάροις τετυκεῖν ἅλις ἔνδον ἐόντων .
15.78 ἀμφότερον , κῦδός τε καὶ ἀγλαΐη καὶ ὄνειαρ ,
15.79 δειπνήσαντας ἴμεν πολλὴν ἐπʹ ἀπείρονα γαῖαν .
15.80 εἰ δʹ ἐθέλεις τραφθῆναι ἀνʹ Ἑλλάδα καὶ μέσον Ἄργος ,
15.81 ὄφρα τοι αὐτὸς ἕπωμαι , ὑποζεύξω δέ τοι ἵππους ,
15.82 ἄστεα δʹ ἀνθρώπων ἡγήσομαι · οὐδέ τις ἡμέας
15.83 αὔτως ἀππέμψει , δώσει δέ τι ἕν γε φέρεσθαι ,
15.84 ἠέ τινα τριπόδων εὐχάλκων ἠὲ λεβήτων ,
15.85 ἠὲ δύʹ ἡμιόνους ἠὲ χρύσειον ἄλεισον .
15.86 τὸν δʹ αὖ Τηλέμαχος πεπνυμένος ἀντίον ηὔδα ·
15.87 Ἀτρεΐδη Μενέλαε διοτρεφές , ὄρχαμε λαῶν ,
15.88 βούλομαι ἤδη νεῖσθαι ἐφʹ ἡμέτερʹ · οὐ γὰρ ὄπισθεν
15.89 οὖρον ἰὼν κατέλειπον ἐπὶ κτεάτεσσιν ἐμοῖσιν ·
15.90 μὴ πατέρʹ ἀντίθεον διζήμενος αὐτὸς ὄλωμαι ,
15.91 ἤ τί μοι ἐκ μεγάρων κειμήλιον ἐσθλὸν ὄληται .