15.33 ἀλλὰ ἑκὰς νήσων ἀπέχειν εὐεργέα νῆα ,
15.34 νυκτὶ δʹ ὁμῶς πλείειν · πέμψει δέ τοι οὖρον ὄπισθεν
15.35 ἀθανάτων ὅς τίς σε φυλάσσει τε ῥύεταί τε .
15.36 αὐτὰρ ἐπὴν πρώτην ἀκτὴν Ἰθάκης ἀφίκηαι ,
15.37 νῆα μὲν ἐς πόλιν ὀτρῦναι καὶ πάντας ἑταίρους ,
15.38 αὐτὸς δὲ πρώτιστα συβώτην εἰσαφικέσθαι ,
15.39 ὅς τοι ὑῶν ἐπίουρος , ὁμῶς δέ τοι ἤπια οἶδεν .
15.40 ἔνθα δὲ νύκτʹ ἀέσαι · τὸν δʹ ὀτρῦναι πόλιν εἴσω
15.41 ἀγγελίην ἐρέοντα περίφρονι Πηνελοπείῃ ,
15.42 οὕνεκά οἱ σῶς ἐσσὶ καὶ ἐκ Πύλου εἰλήλουθας .
15.43 ἡ μὲν ἄρʹ ὣς εἰποῦσʹ ἀπέβη πρὸς μακρὸν Ὄλυμπον ,
15.44 αὐτὰρ ὁ Νεστορίδην ἐξ ἡδέος ὕπνου ἔγειρεν
15.45 λὰξ ποδὶ κινήσας , καί μιν πρὸς μῦθον ἔειπεν ·
15.46 ἔγρεο , Νεστορίδη Πεισίστρατε , μώνυχας ἵππους
15.47 ζεῦξον ὑφʹ ἅρματʹ ἄγων , ὄφρα πρήσσωμεν ὁδοῖο .
15.48 τὸν δʹ αὖ Νεστορίδης Πεισίστρατος ἀντίον ηὔδα ·
15.49 Τηλέμαχʹ , οὔ πως ἔστιν ἐπειγομένους περ ὁδοῖο
15.50 νύκτα διὰ δνοφερὴν ἐλάαν · τάχα δʹ ἔσσεται ἠώς .
15.51 ἀλλὰ μένʹ εἰς ὅ κε δῶρα φέρων ἐπιδίφρια θήῃ
15.52 ἥρως Ἀτρείδης , δουρικλειτὸς Μενέλαος ,
15.53 καὶ μύθοις ἀγανοῖσι παραυδήσας ἀποπέμψῃ .
15.54 τοῦ γάρ τε ξεῖνος μιμνήσκεται ἤματα πάντα
15.55 ἀνδρὸς ξεινοδόκου , ὅς κεν φιλότητα παράσχῃ .
15.56 ὣς ἔφατʹ , αὐτίκα δὲ χρυσόθρονος ἤλυθεν Ἠώς .
15.57 ἀγχίμολον δέ σφʹ ἦλθε βοὴν ἀγαθὸς Μενέλαος ,
15.58 ἀνστὰς ἐξ εὐνῆς , Ἑλένης πάρα καλλικόμοιο .
15.59 τὸν δʹ ὡς οὖν ἐνόησεν Ὀδυσσῆος φίλος υἱός ,
15.60 σπερχόμενός ῥα χιτῶνα περὶ χροῒ σιγαλόεντα
15.61 δῦνεν , καὶ μέγα φᾶρος ἐπὶ στιβαροῖς βάλετʹ ὤμοις
15.62 ἥρως , βῆ δὲ θύραζε , παριστάμενος δὲ προσηύδα