13.150 ἐκ πομπῆς ἀνιοῦσαν , ἐν ἠεροειδέϊ πόντῳ
13.151 ῥαῖσαι , ἵνʹ ἤδη σχῶνται , ἀπολλήξωσι δὲ πομπῆς
13.152 ἀνθρώπων , μέγα δέ σφιν ὄρος πόλει ἀμφικαλύψαι .
13.153 τὸν δʹ ἀπαμειβόμενος προσέφη νεφεληγερέτα Ζεύς ·
13.154 ὢ πέπον , ὡς μὲν ἐμῷ θυμῷ δοκεῖ εἶναι ἄριστα ,
13.155 ὁππότε κεν δὴ πάντες ἐλαυνομένην προΐδωνται
13.156 λαοὶ ἀπὸ πτόλιος , θεῖναι λίθον ἐγγύθι γαίης
13.157 νηῒ θοῇ ἴκελον , ἵνα θαυμάζωσιν ἅπαντες
13.158 ἄνθρωποι , μέγα δέ σφιν ὄρος πόλει ἀμφικαλύψαι .
13.159 αὐτὰρ ἐπεὶ τό γʹ ἄκουσε Ποσειδάων ἐνοσίχθων ,
13.160 βῆ ῥʹ ἴμεν ἐς Σχερίην , ὅθι Φαίηκες γεγάασιν .
13.161 ἔνθʹ ἔμενʹ · ἡ δὲ μάλα σχεδὸν ἤλυθε ποντοπόρος νηῦς
13.162 ῥίμφα διωκομένη · τῆς δὲ σχεδὸν ἦλθʹ ἐνοσίχθων ,
13.163 ὅς μιν λᾶαν ἔθηκε καὶ ἐρρίζωσεν ἔνερθε
13.164 χειρὶ καταπρηνεῖ ἐλάσας · ὁ δὲ νόσφι βεβήκει .
13.165 οἱ δὲ πρὸς ἀλλήλους ἔπεα πτερόεντʹ ἀγόρευον
13.166 Φαίηκες δολιχήρετμοι , ναυσίκλυτοι ἄνδρες .
13.167 ὧδε δέ τις εἴπεσκεν ἰδὼν ἐς πλησίον ἄλλον ·
13.168 ὤ μοι , τίς δὴ νῆα θοὴν ἐπέδησʹ ἐνὶ πόντῳ
13.169 οἴκαδʹ ἐλαυνομένην ; καὶ δὴ προὐφαίνετο πᾶσα .
13.170 ὣς ἄρα τις εἴπεσκε · τὰ δʹ οὐκ ἴσαν ὡς ἐτέτυκτο .
13.171 τοῖσιν δʹ Ἀλκίνοος ἀγορήσατο καὶ μετέειπεν ·
13.172 ὢ πόποι , ἦ μάλα δή με παλαίφατα θέσφαθʹ ἱκάνει
13.173 πατρὸς ἐμοῦ , ὃς ἔφασκε Ποσειδάωνʹ ἀγάσασθαι
13.174 ἡμῖν , οὕνεκα πομποὶ ἀπήμονές εἰμεν ἁπάντων .
13.175 φῆ ποτὲ Φαιήκων ἀνδρῶν περικαλλέα , νῆα ,
13.176 ἐκ πομπῆς ἀνιοῦσαν , ἐν ἠεροειδέϊ πόντῳ
13.177 ῥαισέμεναι , μέγα δʹ ἧμιν ὄρος πόλει ἀμφικαλύψειν .
13.178 ὣς ἀγόρευʹ ὁ γέρων · τὰ δὲ δὴ νῦν πάντα τελεῖται .