Greek Reader — The Homeric Odyssey (13.179

13.179 ἀλλʹ ἄγεθʹ , ὡς ἂν ἐγὼ εἴπω , πειθώμεθα πάντες ·

13.180 πομπῆς μὲν παύσασθε βροτῶν , ὅτε κέν τις ἵκηται

13.181 ἡμέτερον προτὶ ἄστυ · Ποσειδάωνι δὲ ταύρους

13.182 δώδεκα κεκριμένους ἱερεύσομεν , αἴ κʹ ἐλεήσῃ ,

13.183 μηδʹ ἡμῖν περίμηκες ὄρος πόλει ἀμφικαλύψῃ .

13.184 ὣς ἔφαθʹ , οἱ δʹ ἔδεισαν , ἑτοιμάσσαντο δὲ ταύρους .

13.185 ὣς οἱ μέν ῥʹ εὔχοντο Ποσειδάωνι ἄνακτι

13.186 δήμου Φαιήκων ἡγήτορες ἠδὲ μέδοντες ,

13.187 ἑσταότες περὶ βωμόν . ὁ δʹ ἔγρετο δῖος Ὀδυσσεὺς

13.188 εὕδων ἐν γαίῃ πατρωΐῃ , οὐδέ μιν ἔγνω ,

13.189 ἤδη δὴν ἀπεών · περὶ γὰρ θεὸς ἠέρα χεῦε

13.190 Παλλὰς Ἀθηναίη , κούρη Διός , ὄφρα μιν αὐτὸν

13.191 ἄγνωστον τεύξειεν ἕκαστά τε μυθήσαιτο ,

13.192 μή μιν πρὶν ἄλοχος γνοίη ἀστοί τε φίλοι τε ,

13.193 πρὶν πᾶσαν μνηστῆρας ὑπερβασίην ἀποτῖσαι .

13.194 τοὔνεκʹ ἄρʹ ἀλλοειδέα φαινέσκετο πάντα ἄνακτι ,

13.195 ἀτραπιτοί τε διηνεκέες λιμένες τε πάνορμοι

13.196 πέτραι τʹ ἠλίβατοι καὶ δένδρεα τηλεθόωντα .

13.197 στῆ δʹ ἄρʹ ἀναΐξας καί ῥʹ εἴσιδε πατρίδα γαῖαν ·

13.198 ᾤμωξέν τʹ ἄρ ἔπειτα καὶ ὣ πεπλήγετο μηρὼ

13.199 χερσὶ καταπρηνέσσʹ , ὀλοφυρόμενος δʹ ἔπος ηὔδα ·

13.200 ὤ μοι ἐγώ , τέων αὖτε βροτῶν ἐς γαῖαν ἱκάνω ;

13.201 ἦ ῥʹ οἵ γʹ ὑβρισταί τε καὶ ἄγριοι οὐδὲ δίκαιοι ,

13.202 ἦε φιλόξεινοι , καί σφιν νόος ἐστὶ θεουδής ;

13.203 πῇ δὴ χρήματα πολλὰ φέρω τάδε ; πῇ τε καὶ αὐτὸς

13.204 πλάζομαι ; αἴθʹ ὄφελον μεῖναι παρὰ Φαιήκεσσιν

13.205 αὐτοῦ · ἐγὼ δέ κεν ἄλλον ὑπερμενέων βασιλήων

13.206 ἐξικόμην , ὅς κέν μʹ ἐφίλει καὶ ἔπεμπε νέεσθαι .

13.207 νῦν δʹ οὔτʹ ἄρ πῃ θέσθαι ἐπίσταμαι , οὐδὲ μὲν αὐτοῦ