13.92 δὴ τότε γʹ ἀτρέμας εὗδε , λελασμένος ὅσσʹ ἐπεπόνθει .
13.93 εὖτʹ ἀστὴρ ὑπερέσχε φαάντατος , ὅς τε μάλιστα
13.94 ἔρχεται ἀγγέλλων φάος Ἠοῦς ἠριγενείης ,
13.95 τῆμος δὴ νήσῳ προσεπίλνατο ποντοπόρος νηῦς .
13.96 Φόρκυνος δέ τίς ἐστι λιμήν , ἁλίοιο γέροντος ,
13.97 ἐν δήμῳ Ἰθάκης · δύο δὲ προβλῆτες ἐν αὐτῷ
13.98 ἀκταὶ ἀπορρῶγες , λιμένος ποτιπεπτηυῖαι ,
13.99 αἵ τʹ ἀνέμων σκεπόωσι δυσαήων μέγα κῦμα
13.100 ἔκτοθεν · ἔντοσθεν δέ τʹ ἄνευ δεσμοῖο μένουσι
13.101 νῆες ἐΰσσελμοι , ὅτʹ ἂν ὅρμου μέτρον ἵκωνται .
13.102 αὐτὰρ ἐπὶ κρατὸς λιμένος τανύφυλλος ἐλαίη ,
13.103 ἀγχόθι δʹ αὐτῆς ἄντρον ἐπήρατον ἠεροειδές ,
13.104 ἱρὸν νυμφάων αἱ νηϊάδες καλέονται .
13.105 ἐν δὲ κρητῆρές τε καὶ ἀμφιφορῆες ἔασιν
13.106 λάϊνοι · ἔνθα δʹ ἔπειτα τιθαιβώσσουσι μέλισσαι .
13.107 ἐν δʹ ἱστοὶ λίθεοι περιμήκεες , ἔνθα τε νύμφαι
13.108 φάρεʹ ὑφαίνουσιν ἁλιπόρφυρα , θαῦμα ἰδέσθαι ·
13.109 ἐν δʹ ὕδατʹ ἀενάοντα . δύω δέ τέ οἱ θύραι εἰσίν ,
13.110 αἱ μὲν πρὸς Βορέαο καταιβαταὶ ἀνθρώποισιν ,
13.111 αἱ δʹ αὖ πρὸς Νότου εἰσὶ θεώτεραι · οὐδέ τι κείνῃ
13.112 ἄνδρες ἐσέρχονται , ἀλλʹ ἀθανάτων ὁδός ἐστιν .
13.113 ἔνθʹ οἵ γʹ εἰσέλασαν , πρὶν εἰδότες · ἡ μὲν ἔπειτα
13.114 ἠπείρῳ ἐπέκελσεν , ὅσον τʹ ἐπὶ ἥμισυ πάσης ,
13.115 σπερχομένη · τοῖον γὰρ ἐπείγετο χέρσʹ ἐρετάων ·
13.116 οἱ δʹ ἐκ νηὸς βάντες ἐϋζύγου ἤπειρόνδε
13.117 πρῶτον Ὀδυσσῆα γλαφυρῆς ἐκ νηὸς ἄειραν
13.118 αὐτῷ σύν τε λίνῳ καὶ ῥήγεϊ σιγαλόεντι ,
13.119 κὰδ δʹ ἄρʹ ἐπὶ ψαμάθῳ ἔθεσαν δεδμημένον ὕπνῳ ,
13.120 ἐκ δὲ κτήματʹ ἄειραν , ἅ οἱ Φαίηκες ἀγαυοὶ
13.121 ὤπασαν οἴκαδʹ ἰόντι διὰ μεγάθυμον Ἀθήνην .