11.265 ναιέμεν εὐρύχορον Θήβην , κρατερώ περ ἐόντε .
11.266 τὴν δὲ μετʹ Ἀλκμήνην ἴδον , Ἀμφιτρύωνος ἄκοιτιν ,
11.267 ἥ ῥʹ Ἡρακλῆα θρασυμέμνονα θυμολέοντα
11.268 γείνατʹ ἐν ἀγκοίνῃσι Διὸς μεγάλοιο μιγεῖσα ·
11.269 καὶ Μεγάρην , Κρείοντος ὑπερθύμοιο θύγατρα ,
11.270 τὴν ἔχεν Ἀμφιτρύωνος υἱὸς μένος αἰὲν ἀτειρής .
11.271 μητέρα τʹ Οἰδιπόδαο ἴδον , καλὴν Ἐπικάστην ,
11.272 ἣ μέγα ἔργον ἔρεξεν ἀιδρείῃσι νόοιο
11.273 γημαμένη ᾧ υἷι · ὁ δʹ ὃν πατέρʹ ἐξεναρίξας
11.274 γῆμεν · ἄφαρ δʹ ἀνάπυστα θεοὶ θέσαν ἀνθρώποισιν .
11.275 ἀλλʹ ὁ μὲν ἐν Θήβῃ πολυηράτῳ ἄλγεα πάσχων
11.276 Καδμείων ἤνασσε θεῶν ὀλοὰς διὰ βουλάς ·
11.277 ἡ δʹ ἔβη εἰς Ἀίδαο πυλάρταο κρατεροῖο ,
11.278 ἁψαμένη βρόχον αἰπὺν ἀφʹ ὑψηλοῖο μελάθρου ,
11.279 ᾧ ἄχεϊ σχομένη · τῷ δʹ ἄλγεα κάλλιπʹ ὀπίσσω
11.280 πολλὰ μάλʹ , ὅσσα τε μητρὸς Ἐρινύες ἐκτελέουσιν .
11.281 καὶ Χλῶριν εἶδον περικαλλέα , τήν ποτε Νηλεὺς
11.282 γῆμεν ἑὸν διὰ κάλλος , ἐπεὶ πόρε μυρία ἕδνα ,
11.283 ὁπλοτάτην κούρην Ἀμφίονος Ἰασίδαο ,
11.284 ὅς ποτʹ ἐν Ὀρχομενῷ Μινυείῳ ἶφι ἄνασσεν ·
11.285 ἡ δὲ Πύλου βασίλευε , τέκεν δέ οἱ ἀγλαὰ τέκνα ,
11.286 Νέστορά τε Χρόνιον τε Περικλύμενόν τʹ ἀγέρωχον .
11.287 τοῖσι δʹ ἐπʹ ἰφθίμην Πηρὼ τέκε , θαῦμα βροτοῖσι ,
11.288 τὴν πάντες μνώοντο περικτίται · οὐδʹ ἄρα Νηλεὺς
11.289 τῷ ἐδίδου ὃς μὴ ἕλικας βόας εὐρυμετώπους
11.290 ἐκ Φυλάκης ἐλάσειε βίης Ἰφικληείης
11.291 ἀργαλέας · τὰς δʹ οἶος ὑπέσχετο μάντις ἀμύμων
11.292 ἐξελάαν · χαλεπὴ δὲ θεοῦ κατὰ μοῖρα πέδησε ,
11.293 δεσμοί τʹ ἀργαλέοι καὶ βουκόλοι ἀγροιῶται .
11.294 ἀλλʹ ὅτε δὴ μῆνές τε καὶ ἡμέραι ἐξετελεῦντο
11.295 ἂψ περιτελλομένου ἔτεος καὶ ἐπήλυθον ὧραι ,