10.177 μνησόμεθα βρώμης , μηδὲ τρυχώμεθα λιμῷ .
10.178 ὣς ἐφάμην , οἱ δʹ ὦκα ἐμοῖς ἐπέεσσι πίθοντο ,
10.179 ἐκ δὲ καλυψάμενοι παρὰ θῖνʹ ἁλὸς ἀτρυγέτοιο
10.180 θηήσαντʹ ἔλαφον · μάλα γὰρ μέγα θηρίον ἦεν .
10.181 αὐτὰρ ἐπεὶ τάρπησαν ὁρώμενοι ὀφθαλμοῖσιν ,
10.182 χεῖρας νιψάμενοι τεύχοντʹ ἐρικυδέα δαῖτα .
10.183 ὣς τότε μὲν πρόπαν ἦμαρ ἐς ἠέλιον καταδύντα
10.184 ἥμεθα δαινύμενοι κρέα τʹ ἄσπετα καὶ μέθυ ἡδύ ·
10.185 ἦμος δʹ ἠέλιος κατέδυ καὶ ἐπὶ κνέφας ἦλθε ,
10.186 δὴ τότε κοιμήθημεν ἐπὶ ῥηγμῖνι θαλάσσης .
10.187 ἦμος δʹ ἠριγένεια φάνη ῥοδοδάκτυλος Ἠώς ,
10.188 καὶ τότʹ ἐγὼν ἀγορὴν θέμενος μετὰ πᾶσιν ἔειπον ·
10.189 κέκλυτέ μευ μύθων , κακά περ πάσχοντες ἑταῖροι ·
10.190 ὦ φίλοι , οὐ γάρ τʹ ἴδμεν , ὅπῃ ζόφος οὐδʹ ὅπῃ ἠώς ,
10.191 οὐδʹ ὅπῃ ἠέλιος φαεσίμβροτος εἶσʹ ὑπὸ γαῖαν ,
10.192 οὐδʹ ὅπῃ ἀννεῖται · ἀλλὰ φραζώμεθα θᾶσσον
10.193 εἴ τις ἔτʹ ἔσται μῆτις . ἐγὼ δʹ οὔκ οἴομαι εἶναι .
10.194 εἶδον γὰρ σκοπιὴν ἐς παιπαλόεσσαν ἀνελθὼν
10.195 νῆσον , τὴν πέρι πόντος ἀπείριτος ἐστεφάνωται ·
10.196 αὐτὴ δὲ χθαμαλὴ κεῖται · καπνὸν δʹ ἐνὶ μέσσῃ
10.197 ἔδρακον ὀφθαλμοῖσι διὰ δρυμὰ πυκνὰ καὶ ὕλην .
10.198 ὣς ἐφάμην , τοῖσιν δὲ κατεκλάσθη φίλον ἦτορ
10.199 μνησαμένοις ἔργων Λαιστρυγόνος Ἀντιφάταο
10.200 Κύκλωπός τε βίης μεγαλήτορος , ἀνδροφάγοιο .
10.201 κλαῖον δὲ λιγέως θαλερὸν κατὰ δάκρυ χέοντες ·
10.202 ἀλλʹ οὐ γάρ τις πρῆξις ἐγίγνετο μυρομένοισιν .
10.203 αὐτὰρ ἐγὼ δίχα πάντας ἐυκνήμιδας ἑταίρους
10.204 ἠρίθμεον , ἀρχὸν δὲ μετʹ ἀμφοτέροισιν ὄπασσα ·
10.205 τῶν μὲν ἐγὼν ἦρχον , τῶν δʹ Εὐρύλοχος θεοειδής .
10.206 κλήρους δʹ ἐν κυνέῃ χαλκήρεϊ πάλλομεν ὦκα ·
10.207 ἐκ δʹ ἔθορε κλῆρος μεγαλήτορος Εὐρυλόχοιο .