10.208 βῆ δʹ ἰέναι , ἅμα τῷ γε δύω καὶ εἴκοσʹ ἑταῖροι
10.209 κλαίοντες · κατὰ δʹ ἄμμε λίπον γοόωντας ὄπισθεν .
10.210 εὗρον δʹ ἐν βήσσῃσι τετυγμένα δώματα Κίρκης
10.211 ξεστοῖσιν λάεσσι , περισκέπτῳ ἐνὶ χώρῳ ·
10.212 ἀμφὶ δέ μιν λύκοι ἦσαν ὀρέστεροι ἠδὲ λέοντες ,
10.213 τοὺς αὐτὴ κατέθελξεν , ἐπεὶ κακὰ φάρμακʹ ἔδωκεν .
10.214 οὐδʹ οἵ γʹ ὡρμήθησαν ἐπʹ ἀνδράσιν , ἀλλʹ ἄρα τοί γε
10.215 οὐρῇσιν μακρῇσι περισσαίνοντες ἀνέσταν .
10.216 ὡς δʹ ὅτʹ ἂν ἀμφὶ ἄνακτα κύνες δαίτηθεν ἰόντα
10.217 σαίνωσʹ , αἰεὶ γάρ τε φέρει μειλίγματα θυμοῦ ,
10.218 ὣς τοὺς ἀμφὶ λύκοι κρατερώνυχες ἠδὲ λέοντες
10.219 σαῖνον · τοὶ δʹ ἔδεισαν , ἐπεὶ ἴδον αἰνὰ πέλωρα .
10.220 ἔσταν δʹ ἐν προθύροισι θεᾶς καλλιπλοκάμοιο ,
10.221 Κίρκης δʹ ἔνδον ἄκουον ἀειδούσης ὀπὶ καλῇ ,
10.222 ἱστὸν ἐποιχομένης μέγαν ἄμβροτον , οἷα θεάων
10.223 λεπτά τε καὶ χαρίεντα καὶ ἀγλαὰ ἔργα πέλονται .
10.224 τοῖσι δὲ μύθων ἦρχε Πολίτης ὄρχαμος ἀνδρῶν ,
10.225 ὅς μοι κήδιστος ἑτάρων ἦν κεδνότατός τε ·
10.226 ὦ φίλοι , ἔνδον γάρ τις ἐποιχομένη μέγαν ἱστὸν
10.227 καλὸν ἀοιδιάει , δάπεδον δʹ ἅπαν ἀμφιμέμυκεν ,
10.228 ἢ θεὸς ἠὲ γυνή · ἀλλὰ φθεγγώμεθα θᾶσσον .
10.229 ὣς ἄρʹ ἐφώνησεν , τοὶ δὲ φθέγγοντο καλεῦντες .
10.230 ἡ δʹ αἶψʹ ἐξελθοῦσα θύρας ὤιξε φαεινὰς
10.231 καὶ κάλει · οἱ δʹ ἅμα πάντες ἀιδρείῃσιν ἕποντο ·
10.232 Εὐρύλοχος δʹ ὑπέμεινεν , ὀισάμενος δόλον εἶναι .
10.233 εἷσεν δʹ εἰσαγαγοῦσα κατὰ κλισμούς τε θρόνους τε ,
10.234 ἐν δέ σφιν τυρόν τε καὶ ἄλφιτα καὶ μέλι χλωρὸν
10.235 οἴνῳ Πραμνείῳ ἐκύκα · ἀνέμισγε δὲ σίτῳ
10.236 φάρμακα λύγρʹ , ἵνα πάγχυ λαθοίατο πατρίδος αἴης .