Greek Reader — The Homeric Odyssey (9.242

9.242 ἐσθλαὶ τετράκυκλοι ἀπʹ οὔδεος ὀχλίσσειαν ·

9.243 τόσσην ἠλίβατον πέτρην ἐπέθηκε θύρῃσιν .

9.244 ἑζόμενος δʹ ἤμελγεν ὄις καὶ μηκάδας αἶγας ,

9.245 πάντα κατὰ μοῖραν , καὶ ὑπʹ ἔμβρυον ἧκεν ἑκάστῃ .

9.246 αὐτίκα δʹ ἥμισυ μὲν θρέψας λευκοῖο γάλακτος

9.247 πλεκτοῖς ἐν ταλάροισιν ἀμησάμενος κατέθηκεν ,

9.248 ἥμισυ δʹ αὖτʹ ἔστησεν ἐν ἄγγεσιν , ὄφρα οἱ εἴη

9.249 πίνειν αἰνυμένῳ καί οἱ ποτιδόρπιον εἴη .

9.250 αὐτὰρ ἐπεὶ δὴ σπεῦσε πονησάμενος τὰ ἃ ἔργα ,

9.251 καὶ τότε πῦρ ἀνέκαιε καὶ εἴσιδεν , εἴρετο δʹ ἡμέας ·

9.252 ὦ ξεῖνοι , τίνες ἐστέ ; πόθεν πλεῖθʹ ὑγρὰ κέλευθα ;

9.253 ἦ τι κατὰ πρῆξιν ἦ μαψιδίως ἀλάλησθε ,

9.254 οἷά τε ληιστῆρες , ὑπεὶρ ἅλα , τοί τʹ ἀλόωνται

9.255 ψυχὰς παρθέμενοι κακὸν ἀλλοδαποῖσι φέροντες ;

9.256 ὣς ἔφαθʹ , ἡμῖν δʹ αὖτε κατεκλάσθη φίλον ἦτορ ,

9.257 δεισάντων φθόγγον τε βαρὺν αὐτόν τε πέλωρον .

9.258 ἀλλὰ καὶ ὥς μιν ἔπεσσιν ἀμειβόμενος προσέειπον ·

9.259 ἡμεῖς τοι Τροίηθεν ἀποπλαγχθέντες Ἀχαιοὶ

9.260 παντοίοις ἀνέμοισιν ὑπὲρ μέγα λαῖτμα θαλάσσης ,

9.261 οἴκαδε ἱέμενοι , ἄλλην ὁδὸν ἄλλα κέλευθα

9.262 ἤλθομεν · οὕτω που Ζεὺς ἤθελε μητίσασθαι .

9.263 λαοὶ δʹ Ἀτρεΐδεω Ἀγαμέμνονος εὐχόμεθʹ εἶναι ,

9.264 τοῦ δὴ νῦν γε μέγιστον ὑπουράνιον κλέος ἐστί ·

9.265 τόσσην γὰρ διέπερσε πόλιν καὶ ἀπώλεσε λαοὺς

9.266 πολλούς . ἡμεῖς δʹ αὖτε κιχανόμενοι τὰ σὰ γοῦνα

9.267 ἱκόμεθʹ , εἴ τι πόροις ξεινήιον ἠὲ καὶ ἄλλως

9.268 δοίης δωτίνην , ἥ τε ξείνων θέμις ἐστίν .

9.269 ἀλλʹ αἰδεῖο , φέριστε , θεούς · ἱκέται δέ τοί εἰμεν ,

9.270 Ζεὺς δʹ ἐπιτιμήτωρ ἱκετάων τε ξείνων τε ,

9.271 ξείνιος , ὃς ξείνοισιν ἅμʹ αἰδοίοισιν ὀπηδεῖ .