9.272 ὣς ἐφάμην , ὁ δέ μʹ αὐτίκʹ ἀμείβετο νηλέι θυμῷ ·
9.273 νήπιός εἰς , ὦ ξεῖνʹ , ἢ τηλόθεν εἰλήλουθας ,
9.274 ὅς με θεοὺς κέλεαι ἢ δειδίμεν ἢ ἀλέασθαι ·
9.275 οὐ γὰρ Κύκλωπες Διὸς αἰγιόχου ἀλέγουσιν
9.276 οὐδὲ θεῶν μακάρων , ἐπεὶ ἦ πολὺ φέρτεροί εἰμεν ·
9.277 οὐδʹ ἂν ἐγὼ Διὸς ἔχθος ἀλευάμενος πεφιδοίμην
9.278 οὔτε σεῦ οὔθʹ ἑτάρων , εἰ μὴ θυμός με κελεύοι .
9.279 ἀλλά μοι εἴφʹ ὅπῃ ἔσχες ἰὼν ἐυεργέα νῆα ,
9.280 ἤ που ἐπʹ ἐσχατιῆς , ἦ καὶ σχεδόν , ὄφρα δαείω .
9.281 ὣς φάτο πειράζων , ἐμὲ δʹ οὐ λάθεν εἰδότα πολλά ,
9.282 ἀλλά μιν ἄψορρον προσέφην δολίοις ἐπέεσσι ·
9.283 νέα μέν μοι κατέαξε Ποσειδάων ἐνοσίχθων
9.284 πρὸς πέτρῃσι βαλὼν ὑμῆς ἐπὶ πείρασι γαίης ,
9.285 ἄκρῃ προσπελάσας · ἄνεμος δʹ ἐκ πόντου ἔνεικεν ·
9.286 αὐτὰρ ἐγὼ σὺν τοῖσδε ὑπέκφυγον αἰπὺν ὄλεθρον .
9.287 ὣς ἐφάμην , ὁ δέ μʹ οὐδὲν ἀμείβετο νηλέι θυμῷ ,
9.288 ἀλλʹ ὅ γʹ ἀναΐξας ἑτάροις ἐπὶ χεῖρας ἴαλλε ,
9.289 σὺν δὲ δύω μάρψας ὥς τε σκύλακας ποτὶ γαίῃ
9.290 κόπτʹ · ἐκ δʹ ἐγκέφαλος χαμάδις ῥέε , δεῦε δὲ γαῖαν .
9.291 τοὺς δὲ διὰ μελεϊστὶ ταμὼν ὡπλίσσατο δόρπον ·
9.292 ἤσθιε δʹ ὥς τε λέων ὀρεσίτροφος , οὐδʹ ἀπέλειπεν ,
9.293 ἔγκατά τε σάρκας τε καὶ ὀστέα μυελόεντα .
9.294 ἡμεῖς δὲ κλαίοντες ἀνεσχέθομεν Διὶ χεῖρας ,
9.295 σχέτλια ἔργʹ ὁρόωντες , ἀμηχανίη δʹ ἔχε θυμόν .
9.296 αὐτὰρ ἐπεὶ Κύκλωψ μεγάλην ἐμπλήσατο νηδὺν
9.297 ἀνδρόμεα κρέʹ ἔδων καὶ ἐπʹ ἄκρητον γάλα πίνων ,
9.298 κεῖτʹ ἔντοσθʹ ἄντροιο τανυσσάμενος διὰ μήλων .
9.299 τὸν μὲν ἐγὼ βούλευσα κατὰ μεγαλήτορα θυμὸν