Greek Reader — The Homeric Odyssey (9.183

9.183 ὑψηλόν , δάφνῃσι κατηρεφές . ἔνθα δὲ πολλὰ

9.184 μῆλʹ , ὄιές τε καὶ αἶγες , ἰαύεσκον · περὶ δʹ αὐλὴ

9.185 ὑψηλὴ δέδμητο κατωρυχέεσσι λίθοισι

9.186 μακρῇσίν τε πίτυσσιν ἰδὲ δρυσὶν ὑψικόμοισιν .

9.187 ἔνθα δʹ ἀνὴρ ἐνίαυε πελώριος , ὅς ῥα τὰ μῆλα

9.188 οἶος ποιμαίνεσκεν ἀπόπροθεν · οὐδὲ μετʹ ἄλλους

9.189 πωλεῖτʹ , ἀλλʹ ἀπάνευθεν ἐὼν ἀθεμίστια ᾔδη .

9.190 καὶ γὰρ θαῦμʹ ἐτέτυκτο πελώριον , οὐδὲ ἐῴκει

9.191 ἀνδρί γε σιτοφάγῳ , ἀλλὰ ῥίῳ ὑλήεντι

9.192 ὑψηλῶν ὀρέων , ὅ τε φαίνεται οἶον ἀπʹ ἄλλων .

9.193 δὴ τότε τοὺς ἄλλους κελόμην ἐρίηρας ἑταίρους

9.194 αὐτοῦ πὰρ νηί τε μένειν καὶ νῆα ἔρυσθαι ,

9.195 αὐτὰρ ἐγὼ κρίνας ἑτάρων δυοκαίδεκʹ ἀρίστους

9.196 βῆν · ἀτὰρ αἴγεον ἀσκὸν ἔχον μέλανος οἴνοιο

9.197 ἡδέος , ὅν μοι ἔδωκε Μάρων , Εὐάνθεος υἱός ,

9.198 ἱρεὺς Ἀπόλλωνος , ὃς Ἴσμαρον ἀμφιβεβήκει ,

9.199 οὕνεκά μιν σὺν παιδὶ περισχόμεθʹ ἠδὲ γυναικὶ

9.200 ἁζόμενοι · ᾤκει γὰρ ἐν ἄλσεϊ δενδρήεντι

9.201 Φοίβου Ἀπόλλωνος . ὁ δέ μοι πόρεν ἀγλαὰ δῶρα ·

9.202 χρυσοῦ μέν μοι ἔδωκʹ ἐυεργέος ἑπτὰ τάλαντα ,

9.203 δῶκε δέ μοι κρητῆρα πανάργυρον , αὐτὰρ ἔπειτα

9.204 οἶνον ἐν ἀμφιφορεῦσι δυώδεκα πᾶσιν ἀφύσσας

9.205 ἡδὺν ἀκηράσιον , θεῖον ποτόν · οὐδέ τις αὐτὸν

9.206 ἠείδη δμώων οὐδʹ ἀμφιπόλων ἐνὶ οἴκῳ ,

9.207 ἀλλʹ αὐτὸς ἄλοχός τε φίλη ταμίη τε μίʹ οἴη .

9.208 τὸν δʹ ὅτε πίνοιεν μελιηδέα οἶνον ἐρυθρόν ,

9.209 ἓν δέπας ἐμπλήσας ὕδατος ἀνὰ εἴκοσι μέτρα

9.210 χεῦʹ , ὀδμὴ δʹ ἡδεῖα ἀπὸ κρητῆρος ὀδώδει

9.211 θεσπεσίη · τότʹ ἂν οὔ τοι ἀποσχέσθαι φίλον ἦεν .

9.212 τοῦ φέρον ἐμπλήσας ἀσκὸν μέγαν , ἐν δὲ καὶ ᾖα