Greek Reader — The Homeric Odyssey (9.124

9.124 ἀνδρῶν χηρεύει , βόσκει δέ τε μηκάδας αἶγας .

9.125 οὐ γὰρ Κυκλώπεσσι νέες πάρα μιλτοπάρῃοι ,

9.126 οὐδʹ ἄνδρες νηῶν ἔνι τέκτονες , οἵ κε κάμοιεν

9.127 νῆας ἐυσσέλμους , αἵ κεν τελέοιεν ἕκαστα

9.128 ἄστεʹ ἐπʹ ἀνθρώπων ἱκνεύμεναι , οἷά τε πολλὰ

9.129 ἄνδρες ἐπʹ ἀλλήλους νηυσὶν περόωσι θάλασσαν ·

9.130 οἵ κέ σφιν καὶ νῆσον ἐυκτιμένην ἐκάμοντο .

9.131 οὐ μὲν γάρ τι κακή γε , φέροι δέ κεν ὥρια πάντα ·

9.132 ἐν μὲν γὰρ λειμῶνες ἁλὸς πολιοῖο παρʹ ὄχθας

9.133 ὑδρηλοὶ μαλακοί · μάλα κʹ ἄφθιτοι ἄμπελοι εἶεν .

9.134 ἐν δʹ ἄροσις λείη · μάλα κεν βαθὺ λήιον αἰεὶ

9.135 εἰς ὥρας ἀμῷεν , ἐπεὶ μάλα πῖαρ ὑπʹ οὖδας .

9.136 ἐν δὲ λιμὴν ἐύορμος , ἵνʹ οὐ χρεὼ πείσματός ἐστιν ,

9.137 οὔτʹ εὐνὰς βαλέειν οὔτε πρυμνήσιʹ ἀνάψαι ,

9.138 ἀλλʹ ἐπικέλσαντας μεῖναι χρόνον εἰς ὅ κε ναυτέων

9.139 θυμὸς ἐποτρύνῃ καὶ ἐπιπνεύσωσιν ἀῆται .

9.140 αὐτὰρ ἐπὶ κρατὸς λιμένος ῥέει ἀγλαὸν ὕδωρ ,

9.141 κρήνη ὑπὸ σπείους · περὶ δʹ αἴγειροι πεφύασιν .

9.142 ἔνθα κατεπλέομεν , καί τις θεὸς ἡγεμόνευεν

9.143 νύκτα διʹ ὀρφναίην , οὐδὲ προυφαίνετʹ ἰδέσθαι ·

9.144 ἀὴρ γὰρ περὶ νηυσὶ βαθεῖʹ ἦν , οὐδὲ σελήνη

9.145 οὐρανόθεν προύφαινε , κατείχετο δὲ νεφέεσσιν .

9.146 ἔνθʹ οὔ τις τὴν νῆσον ἐσέδρακεν ὀφθαλμοῖσιν ,

9.147 οὔτʹ οὖν κύματα μακρὰ κυλινδόμενα προτὶ χέρσον

9.148 εἰσίδομεν , πρὶν νῆας ἐυσσέλμους ἐπικέλσαι .

9.149 κελσάσῃσι δὲ νηυσὶ καθείλομεν ἱστία πάντα ,

9.150 ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης ·

9.151 ἔνθα δʹ ἀποβρίξαντες ἐμείναμεν Ἠῶ δῖαν .

9.152 ἦμος δʹ ἠριγένεια φάνη ῥοδοδάκτυλος Ἠώς ,

9.153 νῆσον θαυμάζοντες ἐδινεόμεσθα κατʹ αὐτήν .