Greek Reader — The Homeric Odyssey (9.91

9.91 οἱ δʹ αἶψʹ οἰχόμενοι μίγεν ἀνδράσι Λωτοφάγοισιν ·

9.92 οὐδʹ ἄρα Λωτοφάγοι μήδονθʹ ἑτάροισιν ὄλεθρον

9.93 ἡμετέροις , ἀλλά σφι δόσαν λωτοῖο πάσασθαι .

9.94 τῶν δʹ ὅς τις λωτοῖο φάγοι μελιηδέα καρπόν ,

9.95 οὐκέτʹ ἀπαγγεῖλαι πάλιν ἤθελεν οὐδὲ νέεσθαι ,

9.96 ἀλλʹ αὐτοῦ βούλοντο μετʹ ἀνδράσι Λωτοφάγοισι

9.97 λωτὸν ἐρεπτόμενοι μενέμεν νόστου τε λαθέσθαι .

9.98 τοὺς μὲν ἐγὼν ἐπὶ νῆας ἄγον κλαίοντας ἀνάγκῃ ,

9.99 νηυσὶ δʹ ἐνὶ γλαφυρῇσιν ὑπὸ ζυγὰ δῆσα ἐρύσσας .

9.100 αὐτὰρ τοὺς ἄλλους κελόμην ἐρίηρας ἑταίρους

9.101 σπερχομένους νηῶν ἐπιβαινέμεν ὠκειάων ,

9.102 μή πώς τις λωτοῖο φαγὼν νόστοιο λάθηται .

9.103 οἱ δʹ αἶψʹ εἴσβαινον καὶ ἐπὶ κληῖσι καθῖζον ,

9.104 ἑξῆς δʹ ἑζόμενοι πολιὴν ἅλα τύπτον ἐρετμοῖς .

9.105 ἔνθεν δὲ προτέρω πλέομεν ἀκαχήμενοι ἦτορ ·

9.106 Κυκλώπων δʹ ἐς γαῖαν ὑπερφιάλων ἀθεμίστων

9.107 ἱκόμεθʹ , οἵ ῥα θεοῖσι πεποιθότες ἀθανάτοισιν

9.108 οὔτε φυτεύουσιν χερσὶν φυτὸν οὔτʹ ἀρόωσιν ,

9.109 ἀλλὰ τά γʹ ἄσπαρτα καὶ ἀνήροτα πάντα φύονται ,

9.110 πυροὶ καὶ κριθαὶ ἠδʹ ἄμπελοι , αἵ τε φέρουσιν

9.111 οἶνον ἐριστάφυλον , καί σφιν Διὸς ὄμβρος ἀέξει .

9.112 τοῖσιν δʹ οὔτʹ ἀγοραὶ βουληφόροι οὔτε θέμιστες ,

9.113 ἀλλʹ οἵ γʹ ὑψηλῶν ὀρέων ναίουσι κάρηνα

9.114 ἐν σπέσσι γλαφυροῖσι , θεμιστεύει δὲ ἕκαστος

9.115 παίδων ἠδʹ ἀλόχων , οὐδʹ ἀλλήλων ἀλέγουσιν .

9.116 νῆσος ἔπειτα λάχεια παρὲκ λιμένος τετάνυσται ,

9.117 γαίης Κυκλώπων οὔτε σχεδὸν οὔτʹ ἀποτηλοῦ ,

9.118 ὑλήεσσʹ · ἐν δʹ αἶγες ἀπειρέσιαι γεγάασιν

9.119 ἄγριαι · οὐ μὲν γὰρ πάτος ἀνθρώπων ἀπερύκει ,

9.120 οὐδέ μιν εἰσοιχνεῦσι κυνηγέται , οἵ τε καθʹ ὕλην

9.121 ἄλγεα πάσχουσιν κορυφὰς ὀρέων ἐφέποντες .

9.122 οὔτʹ ἄρα ποίμνῃσιν καταΐσχεται οὔτʹ ἀρότοισιν ,

9.123 ἀλλʹ ἥ γʹ ἄσπαρτος καὶ ἀνήροτος ἤματα πάντα