Greek Reader — The Homeric Odyssey (9.61

9.61 ὤλονθʹ · οἱ δʹ ἄλλοι φύγομεν θάνατόν τε μόρον τε .

9.62 ἔνθεν δὲ προτέρω πλέομεν ἀκαχήμενοι ἦτορ ,

9.63 ἄσμενοι ἐκ θανάτοιο , φίλους ὀλέσαντες ἑταίρους .

9.64 οὐδʹ ἄρα μοι προτέρω νῆες κίον ἀμφιέλισσαι ,

9.65 πρίν τινα τῶν δειλῶν ἑτάρων τρὶς ἕκαστον ἀῦσαι ,

9.66 οἳ θάνον ἐν πεδίῳ Κικόνων ὕπο δῃωθέντες .

9.67 νηυσὶ δʹ ἐπῶρσʹ ἄνεμον Βορέην νεφεληγερέτα Ζεὺς

9.68 λαίλαπι θεσπεσίῃ , σὺν δὲ νεφέεσσι κάλυψε

9.69 γαῖαν ὁμοῦ καὶ πόντον · ὀρώρει δʹ οὐρανόθεν νύξ .

9.70 αἱ μὲν ἔπειτʹ ἐφέροντʹ ἐπικάρσιαι , ἱστία δέ σφιν

9.71 τριχθά τε καὶ τετραχθὰ διέσχισεν ἲς ἀνέμοιο .

9.72 καὶ τὰ μὲν ἐς νῆας κάθεμεν , δείσαντες ὄλεθρον ,

9.73 αὐτὰς δʹ ἐσσυμένως προερέσσαμεν ἤπειρόνδε .

9.74 ἔνθα δύω νύκτας δύο τʹ ἤματα συνεχὲς αἰεὶ

9.75 κείμεθʹ , ὁμοῦ καμάτῳ τε καὶ ἄλγεσι θυμὸν ἔδοντες .

9.76 ἀλλʹ ὅτε δὴ τρίτον ἦμαρ ἐυπλόκαμος τέλεσʹ Ἠώς ,

9.77 ἱστοὺς στησάμενοι ἀνά θʹ ἱστία λεύκʹ ἐρύσαντες

9.78 ἥμεθα , τὰς δʹ ἄνεμός τε κυβερνῆταί τʹ ἴθυνον .

9.79 καί νύ κεν ἀσκηθὴς ἱκόμην ἐς πατρίδα γαῖαν ·

9.80 ἀλλά με κῦμα ῥόος τε περιγνάμπτοντα Μάλειαν

9.81 καὶ Βορέης ἀπέωσε , παρέπλαγξεν δὲ Κυθήρων .

9.82 ἔνθεν δʹ ἐννῆμαρ φερόμην ὀλοοῖς ἀνέμοισιν

9.83 πόντον ἐπʹ ἰχθυόεντα · ἀτὰρ δεκάτῃ ἐπέβημεν

9.84 γαίης Λωτοφάγων , οἵ τʹ ἄνθινον εἶδαρ ἔδουσιν .

9.85 ἔνθα δʹ ἐπʹ ἠπείρου βῆμεν καὶ ἀφυσσάμεθʹ ὕδωρ ,

9.86 αἶψα δὲ δεῖπνον ἕλοντο θοῇς παρὰ νηυσὶν ἑταῖροι .

9.87 αὐτὰρ ἐπεὶ σίτοιό τʹ ἐπασσάμεθʹ ἠδὲ ποτῆτος ,

9.88 δὴ τοτʹ ἐγὼν ἑτάρους προΐειν πεύθεσθαι ἰόντας ,

9.89 οἵ τινες ἀνέρες εἶεν ἐπὶ χθονὶ σῖτον ἔδοντες

9.90 ἄνδρε δύω κρίνας , τρίτατον κήρυχʹ ἅμʹ ὀπάσσας .