Greek Reader — The Homeric Odyssey (9.31

9.31 ὣς δʹ αὔτως Κίρκη κατερήτυεν ἐν μεγάροισιν

9.32 Αἰαίη δολόεσσα , λιλαιομένη πόσιν εἶναι ·

9.33 ἀλλʹ ἐμὸν οὔ ποτε θυμὸν ἐνὶ στήθεσσιν ἔπειθον .

9.34 ὣς οὐδὲν γλύκιον ἧς πατρίδος οὐδὲ τοκήων

9.35 γίγνεται , εἴ περ καί τις ἀπόπροθι πίονα οἶκον

9.36 γαίῃ ἐν ἀλλοδαπῇ ναίει ἀπάνευθε τοκήων .

9.37 εἰ δʹ ἄγε τοι καὶ νόστον ἐμὸν πολυκηδέʹ ἐνίσπω ,

9.38 ὅν μοι Ζεὺς ἐφέηκεν ἀπὸ Τροίηθεν ἰόντι .

9.39 Ἰλιόθεν με φέρων ἄνεμος Κικόνεσσι πέλασσεν ,

9.40 Ἰσμάρῳ . ἔνθα δʹ ἐγὼ πόλιν ἔπραθον , ὤλεσα δʹ αὐτούς ·

9.41 ἐκ πόλιος δʹ ἀλόχους καὶ κτήματα πολλὰ λαβόντες

9.42 δασσάμεθʹ , ὡς μή τίς μοι ἀτεμβόμενος κίοι ἴσης .

9.43 ἔνθʹ ἦ τοι μὲν ἐγὼ διερῷ ποδὶ φευγέμεν ἡμέας

9.44 ἠνώγεα , τοὶ δὲ μέγα νήπιοι οὐκ ἐπίθοντο .

9.45 ἔνθα δὲ πολλὸν μὲν μέθυ πίνετο , πολλὰ δὲ μῆλα

9.46 ἔσφαζον παρὰ θῖνα καὶ εἰλίποδας ἕλικας βοῦς ·

9.47 τόφρα δʹ ἄρʹ οἰχόμενοι Κίκονες Κικόνεσσι γεγώνευν ,

9.48 οἵ σφιν γείτονες ἦσαν , ἅμα πλέονες καὶ ἀρείους ,

9.49 ἤπειρον ναίοντες , ἐπιστάμενοι μὲν ἀφʹ ἵππων

9.50 ἀνδράσι μάρνασθαι καὶ ὅθι χρὴ πεζὸν ἐόντα .

9.51 ἦλθον ἔπειθʹ ὅσα φύλλα καὶ ἄνθεα γίγνεται ὥρῃ ,

9.52 ἠέριοι · τότε δή ῥα κακὴ Διὸς αἶσα παρέστη

9.53 ἡμῖν αἰνομόροισιν , ἵνʹ ἄλγεα πολλὰ πάθοιμεν .

9.54 στησάμενοι δʹ ἐμάχοντο μάχην παρὰ νηυσὶ θοῇσι ,

9.55 βάλλον δʹ ἀλλήλους χαλκήρεσιν ἐγχείῃσιν .

9.56 ὄφρα μὲν ἠὼς ἦν καὶ ἀέξετο ἱερὸν ἦμαρ ,

9.57 τόφρα δʹ ἀλεξόμενοι μένομεν πλέονάς περ ἐόντας .

9.58 ἦμος δʹ ἠέλιος μετενίσσετο βουλυτόνδε ,

9.59 καὶ τότε δὴ Κίκονες κλῖναν δαμάσαντες Ἀχαιούς .

9.60 ἓξ δʹ ἀφʹ ἑκάστης νηὸς ἐυκνήμιδες ἑταῖροι