Greek Reader — The Homeric Odyssey (9.1

9.1 τὸν δʹ ἀπαμειβόμενος προσέφη πολύμητις Ὀδυσσεύς ·

9.2 Ἀλκίνοε κρεῖον , πάντων ἀριδείκετε λαῶν ,

9.3 ἦ τοι μὲν τόδε καλὸν ἀκουέμεν ἐστὶν ἀοιδοῦ

9.4 τοιοῦδʹ οἷος ὅδʹ ἐστί , θεοῖς ἐναλίγκιος αὐδήν .

9.5 οὐ γὰρ ἐγώ γέ τί φημι τέλος χαριέστερον εἶναι

9.6 ἢ ὅτʹ ἐυφροσύνη μὲν ἔχῃ κάτα δῆμον ἅπαντα ,

9.7 δαιτυμόνες δʹ ἀνὰ δώματʹ ἀκουάζωνται ἀοιδοῦ

9.8 ἥμενοι ἑξείης , παρὰ δὲ πλήθωσι τράπεζαι

9.9 σίτου καὶ κρειῶν , μέθυ δʹ ἐκ κρητῆρος ἀφύσσων

9.10 οἰνοχόος φορέῃσι καὶ ἐγχείῃ δεπάεσσι ·

9.11 τοῦτό τί μοι κάλλιστον ἐνὶ φρεσὶν εἴδεται εἶναι .

9.12 σοὶ δʹ ἐμὰ κήδεα θυμὸς ἐπετράπετο στονόεντα

9.13 εἴρεσθʹ , ὄφρʹ ἔτι μᾶλλον ὀδυρόμενος στεναχίζω ·

9.14 τί πρῶτόν τοι ἔπειτα , τί δʹ ὑστάτιον καταλέξω ;

9.15 κήδεʹ ἐπεί μοι πολλὰ δόσαν θεοὶ Οὐρανίωνες .

9.16 νῦν δʹ ὄνομα πρῶτον μυθήσομαι , ὄφρα καὶ ὑμεῖς

9.17 εἴδετʹ , ἐγὼ δʹ ἂν ἔπειτα φυγὼν ὕπο νηλεὲς ἦμαρ

9.18 ὑμῖν ξεῖνος ἔω καὶ ἀπόπροθι δώματα ναίων .

9.19 εἴμʹ Ὀδυσεὺς Λαερτιάδης , ὃς πᾶσι δόλοισιν

9.20 ἀνθρώποισι μέλω , καί μευ κλέος οὐρανὸν ἵκει .

9.21 ναιετάω δʹ Ἰθάκην ἐυδείελον · ἐν δʹ ὄρος αὐτῇ

9.22 Νήριτον εἰνοσίφυλλον , ἀριπρεπές · ἀμφὶ δὲ νῆσοι

9.23 πολλαὶ ναιετάουσι μάλα σχεδὸν ἀλλήλῃσι ,

9.24 Δουλίχιόν τε Σάμη τε καὶ ὑλήεσσα Ζάκυνθος .

9.25 αὐτὴ δὲ χθαμαλὴ πανυπερτάτη εἰν ἁλὶ κεῖται

9.26 πρὸς ζόφον , αἱ δέ τʹ ἄνευθε πρὸς ἠῶ τʹ ἠέλιόν τε ,

9.27 τρηχεῖʹ , ἀλλʹ ἀγαθὴ κουροτρόφος · οὔ τοι ἐγώ γε

9.28 ἧς γαίης δύναμαι γλυκερώτερον ἄλλο ἰδέσθαι .

9.29 ἦ μέν μʹ αὐτόθʹ ἔρυκε Καλυψώ , δῖα θεάων ,

9.30 ἐν σπέσσι γλαφυροῖσι , λιλαιομένη πόσιν εἶναι ·