6.287 ἥ τʹ ἀέκητι φίλων πατρὸς καὶ μητρὸς ἐόντων ,
6.288 ἀνδράσι μίσγηται , πρίν γʹ ἀμφάδιον γάμον ἐλθεῖν .
6.289 ξεῖνε , σὺ δʹ ὦκʹ ἐμέθεν ξυνίει ἔπος , ὄφρα τάχιστα
6.290 πομπῆς καὶ νόστοιο τύχῃς παρὰ πατρὸς ἐμοῖο .
6.291 δήεις ἀγλαὸν ἄλσος Ἀθήνης ἄγχι κελεύθου
6.292 αἰγείρων · ἐν δὲ κρήνη νάει , ἀμφὶ δὲ λειμών ·
6.293 ἔνθα δὲ πατρὸς ἐμοῦ τέμενος τεθαλυῖά τʹ ἀλωή ,
6.294 τόσσον ἀπὸ πτόλιος , ὅσσον τε γέγωνε βοήσας .
6.295 ἔνθα καθεζόμενος μεῖναι χρόνον , εἰς ὅ κεν ἡμεῖς
6.296 ἄστυδε ἔλθωμεν καὶ ἱκώμεθα δώματα πατρός .
6.297 αὐτὰρ ἐπὴν ἡμέας ἔλπῃ ποτὶ δώματʹ ἀφῖχθαι ,
6.298 καὶ τότε Φαιήκων ἴμεν ἐς πόλιν ἠδʹ ἐρέεσθαι
6.299 δώματα πατρὸς ἐμοῦ μεγαλήτορος Ἀλκινόοιο .
6.300 ῥεῖα δʹ ἀρίγνωτʹ ἐστί , καὶ ἂν πάϊς ἡγήσαιτο
6.301 νήπιος · οὐ μὲν γάρ τι ἐοικότα τοῖσι τέτυκται
6.302 δώματα Φαιήκων , οἷος δόμος Ἀλκινόοιο
6.303 ἥρωος . ἀλλʹ ὁπότʹ ἄν σε δόμοι κεκύθωσι καὶ αὐλή ,
6.304 ὦκα μάλα μεγάροιο διελθέμεν , ὄφρʹ ἂν ἵκηαι
6.305 μητέρʹ ἐμήν · ἡ δʹ ἧσται ἐπʹ ἐσχάρῃ ἐν πυρὸς αὐγῇ ,
6.306 ἠλάκατα στρωφῶσʹ ἁλιπόρφυρα , θαῦμα ἰδέσθαι ,
6.307 κίονι κεκλιμένη · δμωαὶ δέ οἱ εἵατʹ ὄπισθεν .
6.308 ἔνθα δὲ πατρὸς ἐμοῖο θρόνος ποτικέκλιται αὐτῇ ,
6.309 τῷ ὅ γε οἰνοποτάζει ἐφήμενος ἀθάνατος ὥς .
6.310 τὸν παραμειψάμενος μητρὸς περὶ γούνασι χεῖρας
6.311 βάλλειν ἡμετέρης , ἵνα νόστιμον ἦμαρ ἴδηαι
6.312 χαίρων καρπαλίμως , εἰ καὶ μάλα τηλόθεν ἐσσί .
6.313 εἴ κέν τοι κείνη γε φίλα φρονέῃσʹ ἐνὶ θυμῷ ,
6.314 ἐλπωρή τοι ἔπειτα φίλους τʹ ἰδέειν καὶ ἱκέσθαι
6.315 οἶκον ἐυκτίμενον καὶ σὴν ἐς πατρίδα γαῖαν .