6.230 μείζονά τʹ εἰσιδέειν καὶ πάσσονα , κὰδ δὲ κάρητος
6.231 οὔλας ἧκε κόμας , ὑακινθίνῳ ἄνθει ὁμοίας .
6.232 ὡς δʹ ὅτε τις χρυσὸν περιχεύεται ἀργύρῳ ἀνὴρ
6.233 ἴδρις , ὃν Ἥφαιστος δέδαεν καὶ Παλλὰς Ἀθήνη
6.234 τέχνην παντοίην , χαρίεντα δὲ ἔργα τελείει ,
6.235 ὣς ἄρα τῷ κατέχευε χάριν κεφαλῇ τε καὶ ὤμοις .
6.236 ἕζετʹ ἔπειτʹ ἀπάνευθε κιὼν ἐπὶ θῖνα θαλάσσης ,
6.237 κάλλεϊ καὶ χάρισι στίλβων · θηεῖτο δὲ κούρη .
6.238 δή ῥα τότʹ ἀμφιπόλοισιν ἐυπλοκάμοισι μετηύδα ·
6.239 κλῦτέ μευ , ἀμφίπολοι λευκώλενοι , ὄφρα τι εἴπω .
6.240 οὐ πάντων ἀέκητι θεῶν , οἳ Ὄλυμπον ἔχουσιν ,
6.241 Φαιήκεσσʹ ὅδʹ ἀνὴρ ἐπιμίσγεται ἀντιθέοισι ·
6.242 πρόσθεν μὲν γὰρ δή μοι ἀεικέλιος δέατʹ εἶναι ,
6.243 νῦν δὲ θεοῖσιν ἔοικε , τοὶ οὐρανὸν εὐρὺν ἔχουσιν .
6.244 αἲ γὰρ ἐμοὶ τοιόσδε πόσις κεκλημένος εἴη
6.245 ἐνθάδε ναιετάων , καὶ οἱ ἅδοι αὐτόθι μίμνειν .
6.246 ἀλλὰ δότʹ , ἀμφίπολοι , ξείνῳ βρῶσίν τε πόσιν τε .
6.247 ὣς ἔφαθʹ , αἱ δʹ ἄρα τῆς μάλα μὲν κλύον ἠδʹ ἐπίθοντο ,
6.248 πὰρ δʹ ἄρʹ Ὀδυσσῆι ἔθεσαν βρῶσίν τε πόσιν τε .
6.249 ἦ τοι ὁ πῖνε καὶ ἦσθε πολύτλας δῖος Ὀδυσσεὺς
6.250 ἁρπαλέως · δηρὸν γὰρ ἐδητύος ἦεν ἄπαστος .
6.251 αὐτὰρ Ναυσικάα λευκώλενος ἄλλʹ ἐνόησεν ·
6.252 εἵματʹ ἄρα πτύξασα τίθει καλῆς ἐπʹ ἀπήνης ,
6.253 ζεῦξεν δʹ ἡμιόνους κρατερώνυχας , ἂν δʹ ἔβη αὐτή ,
6.254 ὤτρυνεν δʹ Ὀδυσῆα , ἔπος τʹ ἔφατʹ ἔκ τʹ ὀνόμαζεν ·
6.255 ὄρσεο δὴ νῦν , ξεῖνε , πόλινδʹ ἴμεν ὄφρα σε πέμψω
6.256 πατρὸς ἐμοῦ πρὸς δῶμα δαΐφρονος , ἔνθα σέ φημι
6.257 πάντων Φαιήκων εἰδησέμεν ὅσσοι ἄριστοι .