6.118 ἑζόμενος δʹ ὥρμαινε κατὰ φρένα καὶ κατὰ θυμόν ·
6.119 ὤ μοι ἐγώ , τέων αὖτε βροτῶν ἐς γαῖαν ἱκάνω ;
6.120 ἦ ῥʹ οἵ γʹ ὑβρισταί τε καὶ ἄγριοι οὐδὲ δίκαιοι ,
6.121 ἦε φιλόξεινοι καί σφιν νόος ἐστὶ θεουδής ;
6.122 ὥς τέ με κουράων ἀμφήλυθε θῆλυς ἀυτή ·
6.123 νυμφάων , αἳ ἔχουσʹ ὀρέων αἰπεινὰ κάρηνα
6.124 καὶ πηγὰς ποταμῶν καὶ πίσεα ποιήεντα .
6.125 ἦ νύ που ἀνθρώπων εἰμὶ σχεδὸν αὐδηέντων ;
6.126 ἀλλʹ ἄγʹ ἐγὼν αὐτὸς πειρήσομαι ἠδὲ ἴδωμαι .
6.127 ὣς εἰπὼν θάμνων ὑπεδύσετο δῖος Ὀδυσσεύς ,
6.128 ἐκ πυκινῆς δʹ ὕλης πτόρθον κλάσε χειρὶ παχείῃ
6.129 φύλλων , ὡς ῥύσαιτο περὶ χροῒ μήδεα φωτός .
6.130 βῆ δʹ ἴμεν ὥς τε λέων ὀρεσίτροφος ἀλκὶ πεποιθώς ,
6.131 ὅς τʹ εἶσʹ ὑόμενος καὶ ἀήμενος , ἐν δέ οἱ ὄσσε
6.132 δαίεται · αὐτὰρ ὁ βουσὶ μετέρχεται ἢ ὀίεσσιν
6.133 ἠὲ μετʹ ἀγροτέρας ἐλάφους · κέλεται δέ ἑ γαστὴρ
6.134 μήλων πειρήσοντα καὶ ἐς πυκινὸν δόμον ἐλθεῖν ·
6.135 ὣς Ὀδυσεὺς κούρῃσιν ἐυπλοκάμοισιν ἔμελλε
6.136 μίξεσθαι , γυμνός περ ἐών · χρειὼ γὰρ ἵκανε .
6.137 σμερδαλέος δʹ αὐτῇσι φάνη κεκακωμένος ἅλμῃ ,
6.138 τρέσσαν δʹ ἄλλυδις ἄλλη ἐπʹ ἠιόνας προὐχούσας ·
6.139 οἴη δʹ Ἀλκινόου θυγάτηρ μένε · τῇ γὰρ Ἀθήνη
6.140 θάρσος ἐνὶ φρεσὶ θῆκε καὶ ἐκ δέος εἵλετο γυίων .
6.141 στῆ δʹ ἄντα σχομένη · ὁ δὲ μερμήριξεν Ὀδυσσεύς ,
6.142 ἢ γούνων λίσσοιτο λαβὼν ἐυώπιδα κούρην ,
6.143 ἦ αὔτως ἐπέεσσιν ἀποσταδὰ μειλιχίοισι
6.144 λίσσοιτʹ , εἰ δείξειε πόλιν καὶ εἵματα δοίη .
6.145 ὣς ἄρα οἱ φρονέοντι δοάσσατο κέρδιον εἶναι ,
6.146 λίσσεσθαι ἐπέεσσιν ἀποσταδὰ μειλιχίοισι ,
6.147 μή οἱ γοῦνα λαβόντι χολώσαιτο φρένα κούρη .