6.88 ἔνθʹ αἵ γʹ ἡμιόνους μὲν ὑπεκπροέλυσαν ἀπήνης .
6.89 καὶ τὰς μὲν σεῦαν ποταμὸν πάρα δινήεντα
6.90 τρώγειν ἄγρωστιν μελιηδέα · ταὶ δʹ ἀπʹ ἀπήνης
6.91 εἵματα χερσὶν ἕλοντο καὶ ἐσφόρεον μέλαν ὕδωρ ,
6.92 στεῖβον δʹ ἐν βόθροισι θοῶς ἔριδα προφέρουσαι .
6.93 αὐτὰρ ἐπεὶ πλῦνάν τε κάθηράν τε ῥύπα πάντα ,
6.94 ἑξείης πέτασαν παρὰ θῖνʹ ἁλός , ἧχι μάλιστα
6.95 λάιγγας ποτὶ χέρσον ἀποπλύνεσκε θάλασσα .
6.96 αἱ δὲ λοεσσάμεναι καὶ χρισάμεναι λίπʹ ἐλαίῳ
6.97 δεῖπνον ἔπειθʹ εἵλοντο παρʹ ὄχθῃσιν ποταμοῖο ,
6.98 εἵματα δʹ ἠελίοιο μένον τερσήμεναι αὐγῇ .
6.99 αὐτὰρ ἐπεὶ σίτου τάρφθεν δμῳαί τε καὶ αὐτή ,
6.100 σφαίρῃ ταὶ δʹ ἄρʹ ἔπαιζον , ἀπὸ κρήδεμνα βαλοῦσαι ·
6.101 τῇσι δὲ Ναυσικάα λευκώλενος ἤρχετο μολπῆς .
6.102 οἵη δʹ Ἄρτεμις εἶσι κατʹ οὔρεα ἰοχέαιρα ,
6.103 ἢ κατὰ Τηΰγετον περιμήκετον ἢ Ἐρύμανθον ,
6.104 τερπομένη κάπροισι καὶ ὠκείῃς ἐλάφοισι ·
6.105 τῇ δέ θʹ ἅμα νύμφαι , κοῦραι Διὸς αἰγιόχοιο ,
6.106 ἀγρονόμοι παίζουσι , γέγηθε δέ τε φρένα Λητώ ·
6.107 πασάων δʹ ὑπὲρ ἥ γε κάρη ἔχει ἠδὲ μέτωπα ,
6.108 ῥεῖά τʹ ἀριγνώτη πέλεται , καλαὶ δέ τε πᾶσαι ·
6.109 ὣς ἥ γʹ ἀμφιπόλοισι μετέπρεπε παρθένος ἀδμής .
6.110 ἀλλʹ ὅτε δὴ ἄρʹ ἔμελλε πάλιν οἶκόνδε νέεσθαι
6.111 ζεύξασʹ ἡμιόνους πτύξασά τε εἵματα καλά ,
6.112 ἔνθʹ αὖτʹ ἄλλʹ ἐνόησε θεά , γλαυκῶπις Ἀθήνη ,
6.113 ὡς Ὀδυσεὺς ἔγροιτο , ἴδοι τʹ ἐυώπιδα κούρην ,
6.114 ἥ οἱ Φαιήκων ἀνδρῶν πόλιν ἡγήσαιτο .
6.115 σφαῖραν ἔπειτʹ ἔρριψε μετʹ ἀμφίπολον βασίλεια ·
6.116 ἀμφιπόλου μὲν ἅμαρτε , βαθείῃ δʹ ἔμβαλε δίνῃ ·
6.117 αἱ δʹ ἐπὶ μακρὸν ἄυσαν · ὁ δʹ ἔγρετο δῖος Ὀδυσσεύς ,