Greek Reader — The Homeric Odyssey (5.375

5.375 νηχέμεναι μεμαώς . ἴδε δὲ κρείων ἐνοσίχθων ,

5.376 κινήσας δὲ κάρη προτὶ ὃν μυθήσατο θυμόν ·

5.377 οὕτω νῦν κακὰ πολλὰ παθὼν ἀλόω κατὰ πόντον ,

5.378 εἰς ὅ κεν ἀνθρώποισι διοτρεφέεσσι μιγήῃς .

5.379 ἀλλʹ οὐδʹ ὥς σε ἔολπα ὀνόσσεσθαι κακότητος .

5.380 ὣς ἄρα φωνήσας ἵμασεν καλλίτριχας ἵππους ,

5.381 ἵκετο δʹ εἰς Αἰγάς , ὅθι οἱ κλυτὰ δώματʹ ἔασιν .

5.382 αὐτὰρ Ἀθηναίη κούρη Διὸς ἄλλʹ ἐνόησεν .

5.383 ἦ τοι τῶν ἄλλων ἀνέμων κατέδησε κελεύθους ,

5.384 παύσασθαι δʹ ἐκέλευσε καὶ εὐνηθῆναι ἅπαντας ·

5.385 ὦρσε δʹ ἐπὶ κραιπνὸν Βορέην , πρὸ δὲ κύματʹ ἔαξεν ,

5.386 ἧος ὃ Φαιήκεσσι φιληρέτμοισι μιγείη

5.387 διογενὴς Ὀδυσεὺς θάνατον καὶ κῆρας ἀλύξας .

5.388 ἔνθα δύω νύκτας δύο τʹ ἤματα κύματι πηγῷ

5.389 πλάζετο , πολλὰ δέ οἱ κραδίη προτιόσσετʹ ὄλεθρον .

5.390 ἀλλʹ ὅτε δὴ τρίτον ἦμαρ ἐυπλόκαμος τέλεσʹ Ἠώς ,

5.391 καὶ τότʹ ἔπειτʹ ἄνεμος μὲν ἐπαύσατο ἠδὲ γαλήνη

5.392 ἔπλετο νηνεμίη · ὁ δʹ ἄρα σχεδὸν εἴσιδε γαῖαν

5.393 ὀξὺ μάλα προϊδών , μεγάλου ὑπὸ κύματος ἀρθείς .

5.394 ὡς δʹ ὅτʹ ἂν ἀσπάσιος βίοτος παίδεσσι φανήῃ

5.395 πατρός , ὃς ἐν νούσῳ κεῖται κρατέρʹ ἄλγεα πάσχων ,

5.396 δηρὸν τηκόμενος , στυγερὸς δέ οἱ ἔχραε δαίμων ,

5.397 ἀσπάσιον δʹ ἄρα τόν γε θεοὶ κακότητος ἔλυσαν ,

5.398 ὣς Ὀδυσεῖ ἀσπαστὸν ἐείσατο γαῖα καὶ ὕλη ,

5.399 νῆχε δʹ ἐπειγόμενος ποσὶν ἠπείρου ἐπιβῆναι .

5.400 ἀλλʹ ὅτε τόσσον ἀπῆν ὅσσον τε γέγωνε βοήσας ,

5.401 καὶ δὴ δοῦπον ἄκουσε ποτὶ σπιλάδεσσι θαλάσσης ·

5.402 ῥόχθει γὰρ μέγα κῦμα ποτὶ ξερὸν ἠπείροιο

5.403 δεινὸν ἐρευγόμενον , εἴλυτο δὲ πάνθʹ ἁλὸς ἄχνῃ ·

5.404 οὐ γὰρ ἔσαν λιμένες νηῶν ὄχοι , οὐδʹ ἐπιωγαί .