Greek Reader — The Homeric Odyssey (5.29

5.29 Ἑρμεία , σὺ γὰρ αὖτε τά τʹ ἄλλα περ ἄγγελός ἐσσι ,

5.30 νύμφῃ ἐυπλοκάμῳ εἰπεῖν νημερτέα βουλήν ,

5.31 νόστον Ὀδυσσῆος ταλασίφρονος , ὥς κε νέηται

5.32 οὔτε θεῶν πομπῇ οὔτε θνητῶν ἀνθρώπων ·

5.33 ἀλλʹ ὅ γʹ ἐπὶ σχεδίης πολυδέσμου πήματα πάσχων

5.34 ἤματί κʹ εἰκοστῷ Σχερίην ἐρίβωλον ἵκοιτο ,

5.35 Φαιήκων ἐς γαῖαν , οἳ ἀγχίθεοι γεγάασιν ,

5.36 οἵ κέν μιν περὶ κῆρι θεὸν ὣς τιμήσουσιν ,

5.37 πέμψουσιν δʹ ἐν νηὶ φίλην ἐς πατρίδα γαῖαν ,

5.38 χαλκόν τε χρυσόν τε ἅλις ἐσθῆτά τε δόντες ,

5.39 πόλλʹ , ὅσʹ ἂν οὐδέ ποτε Τροίης ἐξήρατʹ Ὀδυσσεύς ,

5.40 εἴ περ ἀπήμων ἦλθε , λαχὼν ἀπὸ ληίδος αἶσαν .

5.41 ὣς γάρ οἱ μοῖρʹ ἐστὶ φίλους τʹ ἰδέειν καὶ ἱκέσθαι

5.42 οἶκον ἐς ὑψόροφον καὶ ἑὴν ἐς πατρίδα γαῖαν .

5.43 ὣς ἔφατʹ , οὐδʹ ἀπίθησε διάκτορος ἀργεϊφόντης .

5.44 αὐτίκʹ ἔπειθʹ ὑπὸ ποσσὶν ἐδήσατο καλὰ πέδιλα ,

5.45 ἀμβρόσια χρύσεια , τά μιν φέρον ἠμὲν ἐφʹ ὑγρὴν

5.46 ἠδʹ ἐπʹ ἀπείρονα γαῖαν ἅμα πνοιῇς ἀνέμοιο .

5.47 εἵλετο δὲ ῥάβδον , τῇ τʹ ἀνδρῶν ὄμματα θέλγει ,

5.48 ὧν ἐθέλει , τοὺς δʹ αὖτε καὶ ὑπνώοντας ἐγείρει .

5.49 τὴν μετὰ χερσὶν ἔχων πέτετο κρατὺς ἀργεϊφόντης .

5.50 Πιερίην δʹ ἐπιβὰς ἐξ αἰθέρος ἔμπεσε πόντῳ ·

5.51 σεύατʹ ἔπειτʹ ἐπὶ κῦμα λάρῳ ὄρνιθι ἐοικώς ,

5.52 ὅς τε κατὰ δεινοὺς κόλπους ἁλὸς ἀτρυγέτοιο

5.53 ἰχθῦς ἀγρώσσων πυκινὰ πτερὰ δεύεται ἅλμῃ ·

5.54 τῷ ἴκελος πολέεσσιν ὀχήσατο κύμασιν Ἑρμῆς .

5.55 ἀλλʹ ὅτε δὴ τὴν νῆσον ἀφίκετο τηλόθʹ ἐοῦσαν ,

5.56 ἔνθʹ ἐκ πόντου βὰς ἰοειδέος ἤπειρόνδε

5.57 ἤιεν , ὄφρα μέγα σπέος ἵκετο , τῷ ἔνι νύμφη