Greek Reader — The Homeric Odyssey (5.58

5.58 ναῖεν ἐυπλόκαμος · τὴν δʹ ἔνδοθι τέτμεν ἐοῦσαν .

5.59 πῦρ μὲν ἐπʹ ἐσχαρόφιν μέγα καίετο , τηλόσε δʹ ὀδμὴ

5.60 κέδρου τʹ εὐκεάτοιο θύου τʹ ἀνὰ νῆσον ὀδώδει

5.61 δαιομένων · ἡ δʹ ἔνδον ἀοιδιάουσʹ ὀπὶ καλῇ

5.62 ἱστὸν ἐποιχομένη χρυσείῃ κερκίδʹ ὕφαινεν .

5.63 ὕλη δὲ σπέος ἀμφὶ πεφύκει τηλεθόωσα ,

5.64 κλήθρη τʹ αἴγειρός τε καὶ εὐώδης κυπάρισσος .

5.65 ἔνθα δέ τʹ ὄρνιθες τανυσίπτεροι εὐνάζοντο ,

5.66 σκῶπές τʹ ἴρηκές τε τανύγλωσσοί τε κορῶναι

5.67 εἰνάλιαι , τῇσίν τε θαλάσσια ἔργα μέμηλεν .

5.68 ἡ δʹ αὐτοῦ τετάνυστο περὶ σπείους γλαφυροῖο

5.69 ἡμερὶς ἡβώωσα , τεθήλει δὲ σταφυλῇσι .

5.70 κρῆναι δʹ ἑξείης πίσυρες ῥέον ὕδατι λευκῷ ,

5.71 πλησίαι ἀλλήλων τετραμμέναι ἄλλυδις ἄλλη .

5.72 ἀμφὶ δὲ λειμῶνες μαλακοὶ ἴου ἠδὲ σελίνου

5.73 θήλεον . ἔνθα κʹ ἔπειτα καὶ ἀθάνατός περ ἐπελθὼν

5.74 θηήσαιτο ἰδὼν καὶ τερφθείη φρεσὶν ᾗσιν .

5.75 ἔνθα στὰς θηεῖτο διάκτορος ἀργεϊφόντης .

5.76 αὐτὰρ ἐπεὶ δὴ πάντα ἑῷ θηήσατο θυμῷ ,

5.77 αὐτίκʹ ἄρʹ εἰς εὐρὺ σπέος ἤλυθεν . οὐδέ μιν ἄντην

5.78 ἠγνοίησεν ἰδοῦσα Καλυψώ , δῖα θεάων ·

5.79 οὐ γάρ τʹ ἀγνῶτες θεοὶ ἀλλήλοισι πέλονται

5.80 ἀθάνατοι , οὐδʹ εἴ τις ἀπόπροθι δώματα ναίει .

5.81 οὐδʹ ἄρʹ Ὀδυσσῆα μεγαλήτορα ἔνδον ἔτετμεν ,

5.82 ἀλλʹ ὅ γʹ ἐπʹ ἀκτῆς κλαῖε καθήμενος , ἔνθα πάρος περ ,

5.83 δάκρυσι καὶ στοναχῇσι καὶ ἄλγεσι θυμὸν ἐρέχθων .

5.84 πόντον ἐπʹ ἀτρύγετον δερκέσκετο δάκρυα λείβων .

5.85 Ἑρμείαν δʹ ἐρέεινε Καλυψώ , δῖα θεάων ,

5.86 ἐν θρόνῳ ἱδρύσασα φαεινῷ σιγαλόεντι ·

5.87 τίπτε μοι , Ἑρμεία χρυσόρραπι , εἰλήλουθας

5.88 αἰδοῖός τε φίλος τε ; πάρος γε μὲν οὔ τι θαμίζεις .