Greek Reader — The Homeric Odyssey (4.758

4.758 ὣς φάτο , τῆς δʹ εὔνησε γόον , σχέθε δʹ ὄσσε γόοιο .

4.759 ἡ δʹ ὑδρηναμένη , καθαρὰ χροῒ εἵμαθʹ ἑλοῦσα

4.760 εἰς ὑπερῷʹ ἀνέβαινε σὺν ἀμφιπόλοισι γυναιξίν ,

4.761 ἐν δʹ ἔθετʹ οὐλοχύτας κανέῳ , ἠρᾶτο δʹ Ἀθήνῃ ·

4.762 κλῦθί μευ , αἰγιόχοιο Διὸς τέκος , Ἀτρυτώνη ,

4.763 εἴ ποτέ τοι πολύμητις ἐνὶ μεγάροισιν Ὀδυσσεὺς

4.764 ἢ βοὸς ἢ ὄϊος κατὰ πίονα μηρίʹ ἔκηε ,

4.765 τῶν νῦν μοι μνῆσαι , καί μοι φίλον υἷα σάωσον ,

4.766 μνηστῆρας δʹ ἀπάλαλκε κακῶς ὑπερηνορέοντας .

4.767 ὣς εἰποῦσʹ ὀλόλυξε , θεὰ δέ οἱ ἔκλυεν ἀρῆς .

4.768 μνηστῆρες δʹ ὁμάδησαν ἀνὰ μέγαρα σκιόεντα ·

4.769 ὧδε δέ τις εἴπεσκε νέων ὑπερηνορεόντων ·

4.770 ἦ μάλα δὴ γάμον ἄμμι πολυμνήστη βασίλεια

4.771 ἀρτύει , οὐδέ τι οἶδεν ὅ οἱ φόνος υἷι τέτυκται .

4.772 ὣς ἄρα τις εἴπεσκε , τὰ δʹ οὐκ ἴσαν ὡς ἐτέτυκτο .

4.773 τοῖσιν δʹ Ἀντίνοος ἀγορήσατο καὶ μετέειπε ·

4.774 δαιμόνιοι , μύθους μὲν ὑπερφιάλους ἀλέασθε

4.775 πάντας ὁμῶς , μή πού τις ἀπαγγείλῃσι καὶ εἴσω .

4.776 ἀλλʹ ἄγε σιγῇ τοῖον ἀναστάντες τελέωμεν

4.777 μῦθον , ὃ δὴ καὶ πᾶσιν ἐνὶ φρεσὶν ἤραρεν ἡμῖν .

4.778 ὣς εἰπὼν ἐκρίνατʹ ἐείκοσι φῶτας ἀρίστους ,

4.779 βὰν δʹ ἰέναι ἐπὶ νῆα θοὴν καὶ θῖνα θαλάσσης .

4.780 νῆα μὲν οὖν πάμπρωτον ἁλὸς βένθοσδε ἔρυσσαν ,

4.781 ἐν δʹ ἱστόν τʹ ἐτίθεντο καὶ ἱστία νηὶ μελαίνῃ ,

4.782 ἠρτύναντο δʹ ἐρετμὰ τροποῖς ἐν δερματίνοισιν ,

4.783 πάντα κατὰ μοῖραν , ἀνά θʹ ἱστία λευκὰ πέτασσαν ·

4.784 τεύχεα δέ σφʹ ἤνεικαν ὑπέρθυμοι θεράποντες .

4.785 ὑψοῦ δʹ ἐν νοτίῳ τήν γʹ ὥρμισαν , ἐκ δʹ ἔβαν αὐτοί ·