Greek Reader — The Homeric Odyssey (4.498

4.498 εἷς δʹ ἔτι που ζωὸς κατερύκεται εὐρέι πόντῳ .

4.499 Αἴας μὲν μετὰ νηυσὶ δάμη δολιχηρέτμοισι .

4.500 Γυρῇσίν μιν πρῶτα Ποσειδάων ἐπέλασσεν

4.501 πέτρῃσιν μεγάλῃσι καὶ ἐξεσάωσε θαλάσσης ·

4.502 καί νύ κεν ἔκφυγε κῆρα καὶ ἐχθόμενός περ Ἀθήνῃ ,

4.503 εἰ μὴ ὑπερφίαλον ἔπος ἔκβαλε καὶ μέγʹ ἀάσθη ·

4.504 φῆ ῥʹ ἀέκητι θεῶν φυγέειν μέγα λαῖτμα θαλάσσης .

4.505 τοῦ δὲ Ποσειδάων μεγάλʹ ἔκλυεν αὐδήσαντος ·

4.506 αὐτίκʹ ἔπειτα τρίαιναν ἑλὼν χερσὶ στιβαρῇσιν

4.507 ἤλασε Γυραίην πέτρην , ἀπὸ δʹ ἔσχισεν αὐτήν ·

4.508 καὶ τὸ μὲν αὐτόθι μεῖνε , τὸ δὲ τρύφος ἔμπεσε πόντῳ ,

4.509 τῷ ῥʹ Αἴας τὸ πρῶτον ἐφεζόμενος μέγʹ ἀάσθη ·

4.510 τὸν δʹ ἐφόρει κατὰ πόντον ἀπείρονα κυμαίνοντα .

4.511 ὣς ὁ μὲν ἔνθʹ ἀπόλωλεν , ἐπεὶ πίεν ἁλμυρὸν ὕδωρ .

4.512 σὸς δέ που ἔκφυγε κῆρας ἀδελφεὸς ἠδʹ ὑπάλυξεν

4.513 ἐν νηυσὶ γλαφυρῇσι · σάωσε δὲ πότνια Ἥρη .

4.514 ἀλλʹ ὅτε δὴ τάχʹ ἔμελλε Μαλειάων ὄρος αἰπὺ

4.515 ἵξεσθαι , τότε δή μιν ἀναρπάξασα θύελλα

4.516 πόντον ἐπʹ ἰχθυόεντα φέρεν βαρέα στενάχοντα ,

4.517 ἀγροῦ ἐπʹ ἐσχατιήν , ὅθι δώματα ναῖε Θυέστης

4.518 τὸ πρίν , ἀτὰρ τότʹ ἔναιε Θυεστιάδης Αἴγισθος .

4.519 ἀλλʹ ὅτε δὴ καὶ κεῖθεν ἐφαίνετο νόστος ἀπήμων ,

4.520 ἂψ δὲ θεοὶ οὖρον στρέψαν , καὶ οἴκαδʹ ἵκοντο ,

4.521 ἦ τοι ὁ μὲν χαίρων ἐπεβήσετο πατρίδος αἴης

4.522 καὶ κύνει ἁπτόμενος ἣν πατρίδα · πολλὰ δʹ ἀπʹ αὐτοῦ

4.523 δάκρυα θερμὰ χέοντʹ , ἐπεὶ ἀσπασίως ἴδε γαῖαν .

4.524 τὸν δʹ ἄρʹ ἀπὸ σκοπιῆς εἶδε σκοπός , ὅν ῥα καθεῖσεν

4.525 Αἴγισθος δολόμητις ἄγων , ὑπὸ δʹ ἔσχετο μισθὸν

4.526 χρυσοῦ δοιὰ τάλαντα · φύλασσε δʹ ὅ γʹ εἰς ἐνιαυτόν ,