Greek Reader — The Homeric Odyssey (4.471

4.471 ὣς ἐφάμην , ὁ δέ μʹ αὐτίκʹ ἀμειβόμενος προσέειπεν ·

4.472 ἀλλὰ μάλʹ ὤφελλες Διί τʹ ἄλλοισίν τε θεοῖσι

4.473 ῥέξας ἱερὰ κάλʹ ἀναβαινέμεν , ὄφρα τάχιστα

4.474 σὴν ἐς πατρίδʹ ἵκοιο πλέων ἐπὶ οἴνοπα πόντον .

4.475 οὐ γάρ τοι πρὶν μοῖρα φίλους τʹ ἰδέειν καὶ ἱκέσθαι

4.476 οἶκον ἐυκτίμενον καὶ σὴν ἐς πατρίδα γαῖαν ,

4.477 πρίν γʹ ὅτʹ ἂν Αἰγύπτοιο , διιπετέος ποταμοῖο ,

4.478 αὖτις ὕδωρ ἔλθῃς ῥέξῃς θʹ ἱερὰς ἑκατόμβας

4.479 ἀθανάτοισι θεοῖσι , τοὶ οὐρανὸν εὐρὺν ἔχουσι ·

4.480 καὶ τότε τοι δώσουσιν ὁδὸν θεοί , ἣν σὺ μενοινᾷς .

4.481 ὣς ἔφατʹ , αὐτὰρ ἐμοί γε κατεκλάσθη φίλον ἦτορ ,

4.482 οὕνεκά μʹ αὖτις ἄνωγεν ἐπʹ ἠεροειδέα πόντον

4.483 Αἴγυπτόνδʹ ἰέναι , δολιχὴν ὁδὸν ἀργαλέην τε .

4.484 ἀλλὰ καὶ ὣς μύθοισιν ἀμειβόμενος προσέειπον ·

4.485 ταῦτα μὲν οὕτω δὴ τελέω , γέρον , ὡς σὺ κελεύεις .

4.486 ἀλλʹ ἄγε μοι τόδε εἰπὲ καὶ ἀτρεκέως κατάλεξον ,

4.487 ἢ πάντες σὺν νηυσὶν ἀπήμονες ἦλθον Ἀχαιοί ,

4.488 οὓς Νέστωρ καὶ ἐγὼ λίπομεν Τροίηθεν ἰόντες ,

4.489 ἦέ τις ὤλετʹ ὀλέθρῳ ἀδευκέι ἧς ἐπὶ νηὸς

4.490 ἠὲ φίλων ἐν χερσίν , ἐπεὶ πόλεμον τολύπευσεν .

4.491 ὣς ἐφάμην , ὁ δέ μʹ αὐτίκʹ ἀμειβόμενος προσέειπεν ·

4.492 Ἀτρεΐδη , τί με ταῦτα διείρεαι ; οὐδέ τί σε χρὴ

4.493 ἴδμεναι , οὐδὲ δαῆναι ἐμὸν νόον · οὐδέ σέ φημι

4.494 δὴν ἄκλαυτον ἔσεσθαι , ἐπὴν ἐὺ πάντα πύθηαι .

4.495 πολλοὶ μὲν γὰρ τῶν γε δάμεν , πολλοὶ δὲ λίποντο ·

4.496 ἀρχοὶ δʹ αὖ δύο μοῦνοι Ἀχαιῶν χαλκοχιτώνων

4.497 ἐν νόστῳ ἀπόλοντο · μάχῃ δέ τε καὶ σὺ παρῆσθα .