Greek Reader — The Homeric Odyssey (4.415

4.415 καὶ τότʹ ἔπειθʹ ὑμῖν μελέτω κάρτος τε βίη τε ,

4.416 αὖθι δʹ ἔχειν μεμαῶτα καὶ ἐσσύμενόν περ ἀλύξαι .

4.417 πάντα δὲ γιγνόμενος πειρήσεται , ὅσσʹ ἐπὶ γαῖαν

4.418 ἑρπετὰ γίγνονται , καὶ ὕδωρ καὶ θεσπιδαὲς πῦρ ·

4.419 ὑμεῖς δʹ ἀστεμφέως ἐχέμεν μᾶλλόν τε πιέζειν .

4.420 ἀλλʹ ὅτε κεν δή σʹ αὐτὸς ἀνείρηται ἐπέεσσι ,

4.421 τοῖος ἐὼν οἷόν κε κατευνηθέντα ἴδησθε ,

4.422 καὶ τότε δὴ σχέσθαι τε βίης λῦσαί τε γέροντα ,

4.423 ἥρως , εἴρεσθαι δέ , θεῶν ὅς τίς σε χαλέπτει ,

4.424 νόστον θʹ , ὡς ἐπὶ πόντον ἐλεύσεαι ἰχθυόεντα .

4.425 ὣς εἰποῦσʹ ὑπὸ πόντον ἐδύσετο κυμαίνοντα .

4.426 αὐτὰρ ἐγὼν ἐπὶ νῆας , ὅθʹ ἕστασαν ἐν ψαμάθοισιν ,

4.427 ἤια · πολλὰ δέ μοι κραδίη πόρφυρε κιόντι .

4.428 αὐτὰρ ἐπεί ῥʹ ἐπὶ νῆα κατήλυθον ἠδὲ θάλασσαν ,

4.429 δόρπον θʹ ὁπλισάμεσθʹ , ἐπί τʹ ἤλυθεν ἀμβροσίη νύξ ·

4.430 δὴ τότε κοιμήθημεν ἐπὶ ῥηγμῖνι θαλάσσης .

4.431 ἦμος δʹ ἠριγένεια φάνη ῥοδοδάκτυλος Ἠώς ,

4.432 καὶ τότε δὴ παρὰ θῖνα θαλάσσης εὐρυπόροιο

4.433 ἤια πολλὰ θεοὺς γουνούμενος · αὐτὰρ ἑταίρους

4.434 τρεῖς ἄγον , οἷσι μάλιστα πεποίθεα πᾶσαν ἐπʹ ἰθύν .

4.435 τόφρα δʹ ἄρʹ ἥ γʹ ὑποδῦσα θαλάσσης εὐρέα κόλπον

4.436 τέσσαρα φωκάων ἐκ πόντου δέρματʹ ἔνεικε ·

4.437 πάντα δʹ ἔσαν νεόδαρτα · δόλον δʹ ἐπεμήδετο πατρί .

4.438 εὐνὰς δʹ ἐν ψαμάθοισι διαγλάψασʹ ἁλίῃσιν

4.439 ἧστο μένουσʹ · ἡμεῖς δὲ μάλα σχεδὸν ἤλθομεν αὐτῆς ·

4.440 ἑξείης δʹ εὔνησε , βάλεν δʹ ἐπὶ δέρμα ἑκάστῳ .

4.441 ἔνθα κεν αἰνότατος λόχος ἔπλετο · τεῖρε γὰρ αἰνῶς

4.442 φωκάων ἁλιοτρεφέων ὀλοώτατος ὀδμή ·

4.443 τίς γάρ κʹ εἰναλίῳ παρὰ κήτεϊ κοιμηθείη ;