4.120 ἧος ὁ ταῦθʹ ὥρμαινε κατὰ φρένα καὶ κατὰ θυμόν ,
4.121 ἐκ δʹ Ἑλένη θαλάμοιο θυώδεος ὑψορόφοιο
4.122 ἤλυθεν Ἀρτέμιδι χρυσηλακάτῳ ἐικυῖα .
4.123 τῇ δʹ ἄρʹ ἅμʹ Ἀδρήστη κλισίην εὔτυκτον ἔθηκεν ,
4.124 Ἀλκίππη δὲ τάπητα φέρεν μαλακοῦ ἐρίοιο ,
4.125 Φυλὼ δʹ ἀργύρεον τάλαρον φέρε , τόν οἱ ἔθηκεν
4.126 Ἀλκάνδρη , Πολύβοιο δάμαρ , ὃς ἔναιʹ ἐνὶ Θήβῃς
4.127 Αἰγυπτίῃς , ὅθι πλεῖστα δόμοις ἐν κτήματα κεῖται ·
4.128 ὃς Μενελάῳ δῶκε δύʹ ἀργυρέας ἀσαμίνθους ,
4.129 δοιοὺς δὲ τρίποδας , δέκα δὲ χρυσοῖο τάλαντα .
4.130 χωρὶς δʹ αὖθʹ Ἑλένῃ ἄλοχος πόρε κάλλιμα δῶρα ·
4.131 χρυσέην τʹ ἠλακάτην τάλαρόν θʹ ὑπόκυκλον ὄπασσεν
4.132 ἀργύρεον , χρυσῷ δʹ ἐπὶ χείλεα κεκράαντο .
4.133 τόν ῥά οἱ ἀμφίπολος Φυλὼ παρέθηκε φέρουσα
4.134 νήματος ἀσκητοῖο βεβυσμένον · αὐτὰρ ἐπʹ αὐτῷ
4.135 ἠλακάτη τετάνυστο ἰοδνεφὲς εἶρος ἔχουσα .
4.136 ἕζετο δʹ ἐν κλισμῷ , ὑπὸ δὲ θρῆνυς ποσὶν ἦεν .
4.137 αὐτίκα δʹ ἥ γʹ ἐπέεσσι πόσιν ἐρέεινεν ἕκαστα ·
4.138 ἴδμεν δή , Μενέλαε διοτρεφές , οἵ τινες οἵδε
4.139 ἀνδρῶν εὐχετόωνται ἱκανέμεν ἡμέτερον δῶ ;
4.140 ψεύσομαι ἦ ἔτυμον ἐρέω ; κέλεται δέ με θυμός .
4.141 οὐ γάρ πώ τινά φημι ἐοικότα ὧδε ἰδέσθαι
4.142 οὔτʹ ἄνδρʹ οὔτε γυναῖκα , σέβας μʹ ἔχει εἰσορόωσαν ,
4.143 ὡς ὅδʹ Ὀδυσσῆος μεγαλήτορος υἷι ἔοικε ,
4.144 Τηλεμάχῳ , τὸν ἔλειπε νέον γεγαῶτʹ ἐνὶ οἴκῳ
4.145 κεῖνος ἀνήρ , ὅτʹ ἐμεῖο κυνώπιδος εἵνεκʹ Ἀχαιοὶ
4.146 ἤλθεθʹ ὑπὸ Τροίην πόλεμον θρασὺν ὁρμαίνοντες .
4.147 τὴν δʹ ἀπαμειβόμενος προσέφη ξανθὸς Μενέλαος ·
4.148 οὕτω νῦν καὶ ἐγὼ νοέω , γύναι , ὡς σὺ ἐίσκεις ·
4.149 κείνου γὰρ τοιοίδε πόδες τοιαίδε τε χεῖρες