Greek Reader — The Homeric Odyssey (4.92

4.92 λάθρῃ , ἀνωιστί , δόλῳ οὐλομένης ἀλόχοιο ·

4.93 ὣς οὔ τοι χαίρων τοῖσδε κτεάτεσσιν ἀνάσσω .

4.94 καὶ πατέρων τάδε μέλλετʹ ἀκουέμεν , οἵ τινες ὑμῖν

4.95 εἰσίν , ἐπεὶ μάλα πολλὰ πάθον , καὶ ἀπώλεσα οἶκον

4.96 εὖ μάλα ναιετάοντα , κεχανδότα πολλὰ καὶ ἐσθλά .

4.97 ὧν ὄφελον τριτάτην περ ἔχων ἐν δώμασι μοῖραν

4.98 ναίειν , οἱ δʹ ἄνδρες σόοι ἔμμεναι , οἳ τότʹ ὄλοντο

4.99 Τροίῃ ἐν εὐρείῃ ἑκὰς Ἄργεος ἱπποβότοιο .

4.100 ἀλλʹ ἔμπης πάντας μὲν ὀδυρόμενος καὶ ἀχεύων

4.101 πολλάκις ἐν μεγάροισι καθήμενος ἡμετέροισιν

4.102 ἄλλοτε μέν τε γόῳ φρένα τέρπομαι , ἄλλοτε δʹ αὖτε

4.103 παύομαι · αἰψηρὸς δὲ κόρος κρυεροῖο γόοιο .

4.104 τῶν πάντων οὐ τόσσον ὀδύρομαι , ἀχνύμενός περ ,

4.105 ὡς ἑνός , ὅς τέ μοι ὕπνον ἀπεχθαίρει καὶ ἐδωδὴν

4.106 μνωομένῳ , ἐπεὶ οὔ τις Ἀχαιῶν τόσσʹ ἐμόγησεν ,

4.107 ὅσσʹ Ὀδυσεὺς ἐμόγησε καὶ ἤρατο . τῷ δʹ ἄρʹ ἔμελλεν

4.108 αὐτῷ κήδεʹ ἔσεσθαι , ἐμοὶ δʹ ἄχος αἰὲν ἄλαστον

4.109 κείνου , ὅπως δὴ δηρὸν ἀποίχεται , οὐδέ τι ἴδμεν ,

4.110 ζώει ὅ γʹ ἦ τέθνηκεν . ὀδύρονταί νύ που αὐτὸν

4.111 Λαέρτης θʹ ὁ γέρων καὶ ἐχέφρων Πηνελόπεια

4.112 Τηλέμαχός θʹ , ὃν ἔλειπε νέον γεγαῶτʹ ἐνὶ οἴκῳ .

4.113 ὣς φάτο , τῷ δʹ ἄρα πατρὸς ὑφʹ ἵμερον ὦρσε γόοιο .

4.114 δάκρυ δʹ ἀπὸ βλεφάρων χαμάδις βάλε πατρὸς ἀκούσας ,

4.115 χλαῖναν πορφυρέην ἄντʹ ὀφθαλμοῖιν ἀνασχὼν

4.116 ἀμφοτέρῃσιν χερσί . νόησε δέ μιν Μενέλαος ,

4.117 μερμήριξε δʹ ἔπειτα κατὰ φρένα καὶ κατὰ θυμόν ,

4.118 ἠέ μιν αὐτὸν πατρὸς ἐάσειε μνησθῆναι

4.119 ἦ πρῶτʹ ἐξερέοιτο ἕκαστά τε πειρήσαιτο .