3.179 πόλλʹ ἐπὶ μῆρʹ ἔθεμεν , πέλαγος μέγα μετρήσαντες .
3.180 τέτρατον ἦμαρ ἔην , ὅτʹ ἐν Ἄργεϊ νῆας ἐίσας
3.181 Τυδεΐδεω ἕταροι Διομήδεος ἱπποδάμοιο
3.182 ἵστασαν · αὐτάρ ἐγώ γε Πύλονδʹ ἔχον , οὐδέ ποτʹ ἔσβη
3.183 οὖρος , ἐπεὶ δὴ πρῶτα θεὸς προέηκεν ἀῆναι .
3.184 ὣς ἦλθον , φίλε τέκνον , ἀπευθής , οὐδέ τι οἶδα
3.185 κείνων , οἵ τʹ ἐσάωθεν Ἀχαιῶν οἵ τʹ ἀπόλοντο .
3.186 ὅσσα δʹ ἐνὶ μεγάροισι καθήμενος ἡμετέροισι
3.187 πεύθομαι , ἣ θέμις ἐστί , δαήσεαι , κοὐδέ σε δεύσω .
3.188 εὖ μὲν Μυρμιδόνας φάσʹ ἐλθέμεν ἐγχεσιμώρους ,
3.189 οὓς ἄγʹ Ἀχιλλῆος μεγαθύμου φαίδιμος υἱός ,
3.190 εὖ δὲ Φιλοκτήτην , Ποιάντιον ἀγλαὸν υἱόν .
3.191 πάντας δʹ Ἰδομενεὺς Κρήτην εἰσήγαγʹ ἑταίρους ,
3.192 οἳ φύγον ἐκ πολέμου , πόντος δέ οἱ οὔ τινʹ ἀπηύρα .
3.193 Ἀτρεΐδην δὲ καὶ αὐτοὶ ἀκούετε , νόσφιν ἐόντες ,
3.194 ὥς τʹ ἦλθʹ , ὥς τʹ Αἴγισθος ἐμήσατο λυγρὸν ὄλεθρον .
3.195 ἀλλʹ ἦ τοι κεῖνος μὲν ἐπισμυγερῶς ἀπέτισεν ·
3.196 ὡς ἀγαθὸν καὶ παῖδα καταφθιμένοιο λιπέσθαι
3.197 ἀνδρός , ἐπεὶ καὶ κεῖνος ἐτίσατο πατροφονῆα ,
3.198 Αἴγισθον δολόμητιν , ὅ οἱ πατέρα κλυτὸν ἔκτα .
3.199 καὶ σὺ φίλος , μάλα γάρ σʹ ὁρόω καλόν τε μέγαν τε ,
3.200 ἄλκιμος ἔσσʹ , ἵνα τίς σε καὶ ὀψιγόνων ἐὺ εἴπῃ .
3.201 τὸν δʹ αὖ Τηλέμαχος πεπνυμένος ἀντίον ηὔδα ·
3.202 ὦ Νέστορ Νηληϊάδη , μέγα κῦδος Ἀχαιῶν ,
3.203 καὶ λίην κεῖνος μὲν ἐτίσατο , καί οἱ Ἀχαιοὶ
3.204 οἴσουσι κλέος εὐρὺ καὶ ἐσσομένοισι πυθέσθαι ·
3.205 αἲ γὰρ ἐμοὶ τοσσήνδε θεοὶ δύναμιν περιθεῖεν ,
3.206 τίσασθαι μνηστῆρας ὑπερβασίης ἀλεγεινῆς ,
3.207 οἵ τέ μοι ὑβρίζοντες ἀτάσθαλα μηχανόωνται .